Weerarka Waxaa Nagusoo Qaaday Mileeshiyaad Ku Abtirsada Beesha Isaaq, Dhirbaaxo Kulul Ayayna Kala Kulmeen Dadka Degaanka: Duqa Degmada Laasqoray,
Laasqoray (SPR): Iska hor-imaad ka dhacay xeebta degmada Laasqoray ayaa ku nafwaayey 4 ruux, halka 2 ruuxna ay ku dhaawacmeen, sida uu inoo xaqiijiyey duqa degmada Laasqoray, mudane Yuusuf Jaamac Dibad.
Iska hor-imaadkan oo ka dhacay dhinaca Bada gudeheeda, isla markaana laysku waydaarsaday hubka noocyadiisi kala duwan ayaa ka dambeeyay ka dib markii saddex Markab oo ku socday degmada Laasqoray ay weerareen ciidamada Somaliland, halkaasoo beryahan dambe warar soo baxayay ay sheegayeen inay imanayaan Maraakiib Qalab iyo Shaqaale u sidaa Dekeda laasqoray oo dib u dhis lagu samaynayo.
Duqa Magaalada Laasqoray oo u waramaayey Idaacada Bulshada Somaaliyeed ayaa sheegay in shalay dablay hubaysan oo ku abtirsada beesha Isaaq ay weerareen maraakiib u siday qalab iyo shaqaalo ajaaniib ah magaalada Laasqoray islamarkaana ay weerarkaasi kala kulmeen dhirbaaxo kulul.
Mar aynu wax ka waydiinay cidda rasmiga ah uu iska hor-imaadkaasi u dhaxeeyey ayuu sheegay in taliska degaankaasi oo hoosyimaada maamulka Puntland iyo dadka degaanka oo dhinac ah iyo mileeshiyaad kasoo duulay dhanka Berbera uu dagaalka u dhaxeeyey.
Sidoo kale idaacada SPR oo duqa degmada wax ka waydiisay tuhuno sheegaya in halkaasi uu ka socdo qorsho macdan gurasha ah ayuu yiri, "warkaasi waxba kama jiraan, hadayse ay jirto qorshahaasi waxay u taallaa beesha Warsangali oo gobolkani qarniyo difaacaysay, hadalse ugama banaana beesha Isaaq. Adeer meesha laga hadlaayo waa Laasqoray iyo gobolka Sanaag, inaga ayaa u aaba ah degaankani, ayuu yiri mudane Yuusuf Jaamac Dibad."
Dhanka kale mudane Yuusuf Jaamac Dibad ayaa iska hor-imaadkaasi iyo qasaaraha ka dhashayba ku ee'deeyey Waasiirka Gaashaandiga Somaliland. "Cadami ayaa fidnadani ka kow ah, waxaanse u sheegaynaa in aysan mardanbe uusan soo caga dhigan doonin gobolkani, oo aynu talaabo ka qaadayno," ayuu yiri si caro leh u yiri duqa degmada Laasqoray.
Degmada Laasqoray ayaa kamid ah degaamada xeebta ku teedsan ee gobolka Sanaag, iyadoo degmadaasii dhawaanaahanbe ay ka socdeen dedaalo lagu doonayey in dib loogu dhiso deked caalami ah oo baahi tirta adeegyada ganacsiga iyo bulsho ee gobolka Sanaag oo ah gobolka labaad ee ugu wayn guud ahaan dalka Somaliya.
Somali Public Radio
