Arrintan waxay ka dambaysay ka dib markii qaybo ka tirsan ciidanka S/land ay si kedis ah ku galeen gudaha degmada L/qoray ka dibna ciidamo kale oo ka tegay magaalada Bosaso ay iyaguna halkaas gaareen, lakiin ciidankii S/land ayaa shalay halklaas isaga baxay.
Ciidamada S/land oo ku huabysan baabuurta dagaalka oo aad u tira badan ayaa gudaha u galay degmada L/qoray kuwaas oo la sheegay inay markoodii hore ka tageen magaalada Ceerigaabo, ciidankaasi wuxuu fariisimo ka dhigtay gudaha iyo daafaha magaalada L/qoray.
Tallaabadai waxay keentay in maamul goboleedka Puntland uu isaguna halkaas u diro ciidamo ka tiran daraawiishta kuwaas iyana fariisin ka dhigay meel 15km xagga koofureed ka xigta L/qoray.
Maamulka Puntland wuxuu kaloo gobolka Sanaag qaybtiisa bari gaar ahaana degmooyinka L/qoray iyo Badhan u diray masuuliyiin sare kuwaas oo ka soo jeeda gobollkaas.
Maalintii shalay ayaa ciidankii S/land uu isaga baxay degmada L/qoray iyadoo wax dagaal ahi aanay halkaa ka dhicin waxna la ii sheegay in bixitaanka ciidanka S/land ee L/qoray uu ka dambeeyay khilaaf soo kala dhexgalay ciidan ka tirsan S/land laakiin ka soo jeeda degaankaas iyo saraakiisha kale ee ciidamada S/land.
Masuuliyiin ka tirsan maamulka Puntland ayaa iyaguna sheegay in bixitaanka ciidamada S/land uu ka dambeeyay wadahadal dhexmaray madax ka soo jeedda labada dhinac hase ahaatee gobolkaas u wada dhalatay.
Waxaa kaloo masuuliyiinta Puntland ay ii sheegeen in xilligan ay gudaha magaalada L/qoray ku sugan yihiin ciidamada maamul goboleedka Puntland iyo masuuliyiin maamulka ee degmadaas.
Dhowrkii maalmood ee ay xiisaddani taagnayd ayaa gudaha L/qoray waxaa laga dareemayay dareen colaadeed inkasta oo waqtigaan ay magaaladu ku jirto xilliga xagaaga oo badduna ay xiran tahay taas oo dad badani ay u xagaa-baxeen degmooyinka kale .
Maaha markii ugu horraysay ee ciidamo ka soo kala jeeda maamullada S/land iyo Puntland ay ku kulmaan gobolkaas waxana jiray dagaallo hore oo labada dhinac ku dhexmaray degmooyin kale oo gobolkaas ka tirsan.
Marka laga yimaado gobolka Sanaag labada maamul waxay kaloo ku muransan yihiin gobolka Sool oo ay muddo dhowr sano ah ku dagaallamayeen ciidamo ka soo jeeda labadaa maamul.
Laakiin gobolka Sool ayaa waayadan dambe xaaladdiisu ay deggan tahay ka dib markii magaalada L/caano iyo degmooyin kale oo gobolkaas ka tirsani ay si toos ah ugu gacan galeen maamulka S/land oo tan xilligaas halkaas ka talinaya.
