"Boosaaso(AllPuntland)- Gudoomiyaha gobalka Bari ee Puntland Muuse Geelle Yuusuf ayaa shaaca ka qaaday in uusan maamulkiisa gobalka Bari aan lala socodsiin qabashadii wadaadkii ay soo xireen ciidamada PIS-ta ee Puntland, wuxuuna sheegay in lala xisaabtamayo dadkii ka dambeeyey arimahaasi.
Gudoomiyaha ayaa sheegay in ay dadku aad uga xumaadeen falkaas, isla markaasna ay rabshadaha udhigeen isagoo ugu baaqay shacabka in ay isdajiyaan oo sharciga ay uhogaansamaan, wuxuuna tibaaxay in ay dawladda Puntland gudi usoo saartay arinta wadaadkan.
Muuse Geelle ayaa usheegay saxaafada Soomaaliya in aysan wanaagsaneyn in la qaado talaabooyin ay ku kici karaan dadka Shacabka ah, balse wuxuu qiray in lasoo xiri karo cid walboo la tuhmo baaritaan sharciga waafaqsana la marin karo.
Gudoomiyaha gobalka Bari wuxuu beeniyey in la jirdilay wadaadka ay qabteen ciidamada PIS-tu ama uu dhaawac yahay, isagoo tibaaxay in hada gacanta ciidamada booliska lugu wareejiyey Wadaadka lana baarayo, oo hadii dambi lugu helo sharciga la horkeenayo.
Warar madax banaan oo ka soo baxaya maamulka sare ee Puntland ayaa sheegaya in ay dawladda Puntland isku khilaafsan tahay qabashadii wadaadkan, waxaana wararka qaar ay sheegayaan in ay wasiirada Puntland isku raacsaneyn talaabooyinka noocaan oo kale ah, waxaana qaarkoodba ay ka soo horjeedaan in lasoo xiro wadaada Diinta Islaamka oo ay dad badan ka dambeeyaan ama qadarinayaan.
F. C. Geylan
AllPuntland"
