Talaal ka bilowdey Puntland,
23 May 23, 2009 - 12:04:19 PM
Ardada Iskuulka Cafimaadka Garowe
Waxaa maanta 23 May,2009 degaamada maamul goboleedka Puntland hoos yimaada ka furmey barnaamij la yiraahdo maalmaha caafimaadka Caruurta kaas oo ay iska kaashanayaan maamul goboleedka Puntland, UNICEF IYO WHO.
Barnamijkaan maalmaha Cafimaadka Caruurta ayaa waxaa uu ka kooban yahay talaal looga hortago cudurada jadeecada, dabeysha iyo teetanada kaas ay ku jirto Hooyada caruurta dhashay.
Wasiirka Caafimaadka Puntland Dr. Biixi
Goojooyinka la siinayo Caruurtaan ayaa waxaa sidoo kale ku jira Vitamin A oo looga hortagayo Indhabeelka, Gooryaano laga soo ridayo Caruurta, kiniini biyaha nadiifiya iyo wacyi galin Guud.
Adeegan ayaa waxaa la gaarsiin doonaa iyada oo hayáda UNICEF maalgalinta leedahay 230,000 Caruur ah iyo 300,000 Hooyo.
howl wadeeno ka qayb qaadnaya Talaalka
Ololahaan oo ah midkii ugu horeeyey oo laga hirgaliyo maamul goboleedka Puntland laga hirgaliyo intii uu jirey ayaa waxaa xarunta PDRC ee magaalo madaxda Garowe talaalkii ugu horeeyey Ilma yar ku siiyey Madaxweynaha Puntland iyada oo halkaas ku sugnaayeen howlwadeenada Wasaarada Cafimaadka kuwasoo horkacayey shaqaalaha 5 maalmood ka qayb qaadan doona hirgalinta Talaalkaan.
Madaxweynaha Puntland ayaa shacabka Puntland ka dalbadey in si buuxda uga qayb qaataan Ololaha talalkaan isaga oo sheegey in ay tahay mas'uuliyad diimeed iyo mid Waalidnimo.
Talaalkaan oo socon doona 5 Maalmood ayaa waxaa ka qayb qaadanaya 3000 howlwadeeno halka gawaarida gaareyso 430.
Madaxweynaha Pl oo dhagax dhigaya Isbitaal
Dhinaca kale waxaa maanta Madaxweynaha DGPL dhagax dhigey Isbitaal cusub oo loo dhisayo dadka Dhimirkooda wax u dhiman yahay kaas oo ku yaala duleedka magaalo madaxda DGPL.
Munaasadbadaan dhagax dhiga ah ayaa waxaa goob joog ahaa Gudomiyaha gobolka Nugaal, Gudoomiyaha degmada Garowe, madaxa hayáda daryeelka bulshada iyo mas'uuliyin sare oo kale.
Isbitaalkan oo dhismahiisa ka qayb qaadan doonaan dowlada Puntland iyo Ganacsato ayaa 20,000-kii dollar ee ugu horeysay waxaa baxshay Shirkada Dahabshil.
Maamulka cusub ee Puntland ayaa tan iyo intii uu xilka qabtey waxaa u suurta gashay in ganacsatada Puntland kasoo qayb galiyo hurumarka gobolka.
Ganacsatada Puntland kuwooda ku sugan Bosaso ayaa bilihii lasoo dhaafey balan qaadey in ay dhisayaan Isbitaalka Bosaso oo laga dhigayo Labo Dabaq halka shirkada Golis ay sameyneyso calaamadaha wadada dheer ee isku xirta Puntland.
GAROWE ONLINE
