UNDP oo Gaadiid ugu Deeqday Booliska Boosaaso
Thursday, May 28th, 2009 at 1:24 pm
Horseed Media
Boosaaso,
Hay’ada Horumarinta Qaramada Midoobay UNDP ayaa gudoonsiisay ciidamada booliska Puntland 11 gaari oo ay adeegsan doonaan ciidamada booliska.
Munaasabad lagu qabtey gudaha dekeda magaalada Boosaaso ayaa lagu wareejiyey masuuliyiin ka socotey maamulka gawaaridaasi oo isugu jire 10 gaari oo nooca Pick-up ah (ama xaajiyadaha dusha bannaan) iyo hal gaari oo shabaqle ah kaasi oo ah nooca lagu qaado maxaabiista.
Wasiirka amniga Puntland Gen C/laahi Siciid Samatar oo ka hadlay munaasabada laguna wareejiyey furayaasha gawaarida ayaa uga mahad celiyey hay’ada UNDP deeqda gawaarida ee la siiyey, waxaana uu wasiirku sheegay in ay aad uga yar yihiin baahida ay qabaan laakiin ay wax badan u tari doonaan booliska.
Wasiirka amniga waxa uu sheegay in gawaarida 11 ah ee lagu wareejiyey ay u qeybin doonaan saldhigyada booliska ee magaalada Boosaaso, si ay ugu qabsadaan hawlaha ay ciidamada qabtaan.
C/laahi Siciid Samatar, wasiirka amniga Puntland waxa uu sheegay in deeqda noocan oo kale ah ay horumarin karto adeegyada amaan ee ay wadaan booliska.
Gudoomiyaha gobolka Bari Xaaji Muuse Geelle Yuusuf oo isaguna goob joog ka ahaa munaasabada gawaarida lagu gudoonsiinayey booliska ayaa kula dardaarmay saraakiisha booliska inay sare u qaadaan hawsha ay dadka u hayaan ee amaanka.
Waxaa munaasabada sidoo kale ka qeybgaley taliyaha booliska Puntland, masuuliyiin ka socotey hay’ada UNDP xafiiskeeda Puntland.
Waxaa deeqdan ay qeyb ka noqoneysaa deeqo hore oo booliska ay siiyeen hay’adaha Qaramada Midoobay, kuwaasi oo ku hawlan hawlaha horumarinta.
Waxaana deeqda ay ku soo beegmeysaa iyadoo booliska Boosaaso ay waayadan wadeen hawlgallo amaan sugid oo ay ku beegsanayaan kooxaha ku lugta leh falalka amaan darida.
Source :http://horseedmedia.net/portal/somali/21887/
