Gaalkacyo(RBC):- Wafdi ka socda Qaramada Midowbay ayaa maanta ku soo wajahan magaalada Gaalkayo ee gobalka Mudug,ayadoo ay wafdigan la kulmi doonaan Madax ka tirsan dawladda Puntland ee Soomaaliya oo ku sugan magaalada Gaalkacyo.
Wafdigan ka socda Qaramada Midowbay ayaa wada hadalada ay la yeelan doonaan Madaxda dawladda Puntland, waxa ay kala hadlayaan xaaladaha amaanka iyo Xuquuqda Aadanaha ee dalka Soomaaliya, gaar ahaana kuwa magaalada Gaalkacyo.
Saraakiishan Qaramada Midowbay ayaa lasheegay in ay wax badan ka ogaan doonaan xaaladaha Xuquuqda Aadanaha ee ka taagan gobalka Mudug, maadaama ay gobalkaasi ay joogaan dad badan oo dhib ku heysto magaaladaasi.
Masuuliyiinta gobalka Mudug qaarkood ayaa usheegay RBC Radio, in ay wafdigan la socdaan madax sare oo ka tirsan Qaramada Midowbay, uuna hogaamin doono Sarkaalka uqaabilsan Qaramada Midowbay xaaladaha Xuquuqda Aadanaha ee dalka Soomaaliya.
” Wafdigan waxa ay kormeeri doonaan xaaladaha Xuquuqda Aadanaha, markii ay dhaceen Abaaro baahsan iyo soo bakaracayaasha oo ubaahan gargaar deg deg ah, waxaana ugudbin doonaa Warbixinada ku aadan xaaladahaas” Ayuu yiri Masuul sare oo ka tirsan Maamulka gobalka Mudug.
Dawladda Puntland ayaa marar badan udirtay Qaramada Midowbay baaqyo ku aadan in gargaaro deg deg ah, loo soo gaarsiiyo Kumanaan dad ah oo ka soo baxay dagaalada ka jira Koonfurta dalka Soomaaliya iyo dad badan oo abaaro baahsan uga soo cararay xoolahoodii markii ay ka dhamaadeen.
Cawil Maxamuud Cabdi
RBC Radio, Gaalkacyo
