some pictureGaalkacyo (RBC Radio):- Dhalinyaro burcad badeed ah oo mudooyinkii ugu dambeeyay ku xirnaa xabsi ku yaala magaalada Mombasa ee dalka Kenya ayaa maanta laga soo dejiyay Garoonka diyaaradaha ee magaalada Gaalkacyo ee gobolka Mudug.
Dhalinyaradani la sheegay in ay yihiin burcad badeeda ayaa tiro ahaan gaarayey 17 kuwaasi oo muddo hal sano iyo bar ku xirnaa xabsi ku yaala magaalada Mombasa ee dalka Kenya.
Mas’uuliyiinta maamulka gobolka Mudug ayaa dhalinyaradaasi ku soo dhoweeyay Garoonka diyaaradaha ee magaalada Gaalkacyo, waxaana u suurta gashay in dhalinyaradaasi ay u sameeyaan wacyigelin ku aadan in aysan mar dambe ku laaban arimaha burcad badeeda.
Dhalinyaradii burcadbadeeda ee la keenay
Diyaarada siday dhalinyarada burcad badeeda ah ayaa waxaa la socday Agaasimaha Ladagaalanka Burcadbadeeda Puntland C/risaaq Maxamed Dirir oo dhalinyaradaasi ku soo simay maamulka Puntland.
Gudoomiyaha gobolka Mudug Col, Axmed Cali Salaad ayaa dhalinyarada kula hadlay gudaha Garoonka diyaaradaha ee magaalada Gaalkacyo, wuxuuna Gudoomiyuhu dhalinyarada ku soo dhoweeyay dalkoodii hooyo, isagoo kula dardaarmey in ay ka shaqeeyaan samaha dadka Soomaaliyeed, ayna ka tanaasulaan in ay dib ugu laabtaan arimaha burcad badeeda, wuxuuna ka codsadey dhalinyarada in kuwa haatan ku jira burcadbadeednimada ay ka wacyigaliyaan khatarta burcadbadeednimadu leedahay.
Agaasimaha Ladagaalanka Burcadbadeeda Puntland C/risaaq Maxamed Dirir ayaa dhiniciisa sheegay in uu ku faraxsan yahay in dhalinyaro Soomaaliyeed ee dalka dibadiisa ku xirneyd ay xoriyadooda dib u helaan, hase ahaatee uu codsanayo in dhalinyaradu aysan dib ugu laaban falkii lagu qabtey markii hore ee ahaa burcad badeednimada.
Agaasimaha Ladagaalanka Burcadbadeeda Puntland Cabdirisaaq Maxamed Dirir
Dirir ayaa intaa ku daray in uu dhalinyarada ka codsanayo in ay kala shaqeeyaan arimaha la dagaalanka burcad badeeda, ayna ka qeybqaataan hawlaha lagu wacyigelinayo dhalinyarada burcadbadeednimada ku jira, taasi oo ay wado hay’ada ladagaalanka burcadbadeeda ee Puntland.
Liibaan Siciid Axmed oo ka mid ahaa dhalinyaradii lagu eedeeyay in ay ahaayeen burcad badeeda ayaa la hadley warbaahinta wuxuuna sheegay in iyaga dhalinyarada ah aysan ahayn waxa lagu sheegay ee Burcadbadeeda, balse ay ahaayeen dhalinyaro kaluumaysato ah sida uu hadalka u dhigay, isagoo intaa ku daray in dhibaato xoogan lagu soo mariyey xabsiyada Kenya ee ay ku xirnaayeen, wuxuuna ka dhawaajiyey in sii deyntooda aysan gacan ka geysan Maamulka Puntland iyo dowladda FKMG Soomaaliya midkoodna.
Waa markii ugu horeysay ee dhalinyaro burcad badeednimo ku eedeysan laga soo dejiyo Garoonka diyaaradaha ee magaalada Gaalkacyo, waxaana dhalinyaradani maanta laga soo dejiyey garoonka ay yihiin kuwa deegaan ahaan ka soo jeeda Puntland.
Agaasimaha Ladagaalanka Burcadbadeeda Puntland Cabdirisaaq Maxamed Dirir
