Allaha u naxariistee waxaa geeriyoodey Agaasimihii Guud ee Wasaarada Diinta iyo Awqaafta Puntland Shiikh Ismaaciil Xaashi Xuseen kadib markii qarax miino oo dhulka lagu aasay lagula eegtay bartamaha magaalada Gaalkacyo.
Qaraxa miino ee lala eegtay Shiikh Ismaaciil ayaa ahaa mid aad u dhawaaq weyn oo laga wada maqley guud ahaan magaalada Gaalkacyo, waxaana qaraxani ku dhintey Shiikh Ismaaciil, waxaana dhaawac culus uu ka soo gaarey laba ruux oo la socotay iyadoo gaarigii uu Shiikh Ismaaciil wateyna uu burburay.
Shiikh Ismaaciil Xaashi Xuseen ayaa marka qaraxa lala eeganayo waxaa uu si toos ah uga yimid Masjidka Muxamadu Rasuululaahi SCW oo uu salaada duhur jameeco halkaasi ku soo tujiyay, waxaana salaadii duhur kadib Shiikhu masaajidka ka sheegay in dadka wax heysta ay lacago iska aruuriyaan si loo taakuleeyo masaakiinta aan waxba heysan.
Qadar daqiiqado ah kadib markii uu ka soo baxay masaajidka uu salaada duhur ku soo tukaday ayaa waxaa qarax miino oo dhulka lagu sii diyaariyey lagu dilay Agaasimihii guud ee Wasaarada Diinta iyo Awqaafta Puntland Shiikh Ismaaciil Xaashi Xuseen.
Halka uu qaraxu ka dhacay ayaa ahaa ka soo horjeedka shirkadii hore ee STG Galcom, waxaana qaraxu dhacay xilli Shiikh Ismaaciil uu ku sii socday guriga uu ka deganaa magaalada Gaalkacyo.
Dhaawaca laba ruux iyo meydka Shiikh Ismaaciil ayaa durbadiiba waxaa goobta ka qaadey dadweyne maqley qaraxa kuwaasi oo durbadiiba ula cararay dhinaca Isbitaalka guud ee gobolka Mudug.
Shiikh Ismaaciil ayaa ahaa nin si weyn loogu xasuusto ku baraarujinta diinta Islaamka dadweynaha gobolka Mudug, wuxuuna ahaa Culimada waaweyn ee u taagan ka shaqeynta nabadgelyada, wuxuuna bilihii la soo dhaafey masaajida waaweyn ee gobolka Mudug uu ka jeedinayey khudbado diini ah oo uu ku cabirayey dilalka xaq darrada ah iyo qaraxyada ka dhaca dalka Soomaaliya.
Khudbad uu ka jeediyay dhowaan xaflad loo dhigayey Jaamacad cusub oo Gaalkacyo laga furay ayuu Shiikh Ismaaciil waxaa uu maamulka iyo macalimiinta Jaamacada ka codsadey in aan ardeyda la barin waxyaabaha khatarta ah sida in ardey la baro sida la isu qarxiyo.
Allaha u naxariistee Shiikh Ismaaciil Xaashi Xuseen dilkiisa ayaa waxaa si weyn uga naxay dhamaan shacabka Puntland gaar ahaan kuwa ku dhaqan gobolka Mudug, waxaana lagu wadaa in maanta lagu aaso qabuuraha Cirjiife ee magaalada
Gaalkacyo.
RBC Radio.
