Garoowe: (PP)- Wafti balaaran oo ka socda QM gaar ahaan Hay’ada UN-ka ayaa soo gaaray Magaalada Garoowe ee caasimada Puntland islamarkaasna kulamo kala duwan la qaatay madaxda Dowlada Puntland sida Hay’ada kala duwan ee Dowlada Puntland.
Waftigaan oo ka kooban 23 xubnood oo isugu jira madax sare oo ka socday Hay’ada deeq bixiyaasha ah iyo QM ayaa socdaal ku maray laamaha xarrumaha dowlada Puntland iyo aqalka madaxtooyada oo ay kulamo kula qaateen masuuliyiinta sare sare ee Puntland sida madaxwayne kuxigeenka Puntland Gen. Cabdisamad Cali Shire.
Waftigaan ayaa kormeero ay ku mareen xarrumaha Dowlada kaddib waxaa ay shir sharaa’id ku qabteen hoolka shirarka ee Wasaarada Qorshaynta iyo Iskaashigga caalamiga ah ee Dowlada Puntland islamarkaasna madaxda wasaarada ugu warbixiyey ujeedada ay u yimaadeen Puntland, Mrs Asjick lodan oo ka mida madaxdii waftigaan hogaaminaysay ayaa sheegay in ay u yimaadeen Puntland sidii loo eegi lahaa mashaariicdii la qabtay shantii sano ee la soo dhaafay islamarkaasna dib loogu eegi lahaa wixii aan qabsoomin iyo caqabadaha hortaan.
Wasiirka qorshaynta Puntland mudane Daa’uud Maxamed Cumar ayaa waftigaan ugu warbixiyey waxyaalaha ay Dowlada Puntland u baahan tahay in ay Hay’ada deeq bixiyaasha ah ka caawiyaan Puntland, Wasiirka ayaa xusay in Dowlada Puntland ay Hay’ada caalamiga ah ee deeq bixiyaasha ah ay uga baahan yihiin in ay gacan ka siiyaan baahiyaha ay ka midka yihiin horrumarinta mashaariicaha ay Puntland beesha caalamka ku leedahay iyo sidii ay gacan uga gaysan lahaayeen arrimaha gacan siinta qaxootiga, la dagaalanka burcad badeeda, Amaanka guud ee Gobalka, la dagaalanka Argagixisada.
Wasiirka ayaa uga mahad celiyey sida wanaagsan ee ay Hay’ada deeq bixiyaasha ah ay gacan uga gaystaan horrumarinta iyo siyaasada Puntland taas oo ay Puntland markasta diyaar ula tahay in cidkasta oo gacan ka gaysanaysa horrumarinta Puntland ay imaan karaan Puntland.
Sidoo kale waxaa ay waftigaani madaxda Puntland u sheegeen in loo baahan yahay in la diyaariyo qorshaha siyaasadeed ee shanta sano ee soo socota taasoo haatan ay labada dhinac isku afgarteen in ay guul ku soo dhamaadeen waxyaalaha inta badan laga wada hadlay
Dhanka kale waxaa ay labada dhinac isku raaceen in si wadajira loo wada shaqeeyo islamarkaasna ay Hay’ada deeq bixiyaasha ah ay diyaar uyihiin in ay Puntland gacan ka siiyaan waxkasta oo ay uga baahan yihiin Hay’ada QM.
Si kastaba ha ahaatee waxaa hay’adaha Deeq bixyaasha ah iyo Dowlada Puntland ay sanadkasta ka wada hadla sidii dib loogu eedi lahaa mashaariicaha ka socday deegaanada Puntland islamarkaasna loo saxi lahaa
caqabadaha hortaagan waxyaalaha aan qabsoomin taasoo 5- tii sanaba la diyaariyo qorshe cusub oo lagu horrumarinayo siyaasada horumarineed ee Puntland.
