Bursalax:(Allpuntland)-Wafti kasocda Dawlada Puntland ee Soomaaliyeed oo ay Horkacaysay Wasiirka Haweenka Iyo Hormarinta Qoyska Puntland Marwo.Caasho Geelle Diiriye ayaa booqday Beesha Bursaalax oo 62-KM ujirta magaalada Gaalkacyo kana tirsan degmada Galdogob ee gobolka Mudug, Waxaana Waftigan Markii ay tageen Bursalaax kusoo dhaweeyey dad weyne aad u badan, Saraakiisha Maamulka Iyo Taliyihii hore ee Booliska Puntland Gol.Axmed Xassan Cali (Afeey) Iyo xubno kale, Iyagoo markii danbena usii gudbay gudaha magaalada si ay qiimayn Iyo Kormeer ugu sameeyaan Xarumaha adeegyada Bulshada ee muhiimka ah.
Waftigu Waxay booqashadooda ka bilaabaan xarunta weyn ee Kuleejada Bursalaax halkaas oo ah xarun balaaran oo isugujirta qaybaha kaladuwan ee waxbarashada, Waxaana xaruntaas ay warbixin uga dhagaysteen Maamulkeeda oo sheegey inay ka koobantahay Dugsi hoose oo ay dhigtaan Dhowr Boqol oo Caruur ah, Qaybta jiifka, Qaybta cuntada, Qaybta Masaajidka, Qaybta Isboortiga Iyo Qaybo kale iyadoo xaruntanina ay tahay mid waxbarasho ee ugu balaaran ee ka jirta gobolka Mudug, Waftigu waxay kormeereen qaybaha kaladuwan.
Wasiirka Haweenka ee Puntland ayaa la hadashay Caruurta wax ka barata dugsiga hoose dhexe ee Cirro ee Bursaalax taasoo loogu magac daray Jeneraal Cirro Sheekh Cismaan oo kamid ahaa Hogaankii hore ee ciidanka qalabka sida markii danbena kamid ahaa ragii toogashada uu kuxukumay maamulka Kacaanka ee dalka soo maray, Waxayna Caruurtaas ka codsatay inay ku dadalaan waxbarashadooda islamarkaansna ay ka shaqeeyaan sidii ay u noqon lahaayeen dad hormar gaara oo deegaankoodana caawiya, Waxaana ay amaantay Maamulka gacanta ku haya Caruurtan oo qaar agoon ah iyo Masaakiini ay kujiraan Iyadoo Gabdhaha xarunta dhigta ee Agoomaha ahna la siiyo Lacago ay Cunto ku gataan oo Maalin leh ah taasoo ay ku taageeraan Jaaliyada reer Muduga ah gaar ahaana kuwooda reer Bursaalax iyo Muslimiin kale.
Waftigu Waxay sidoo kale Booqdeen Xarunta dugsiga sare ee Burar oo ah dugsi cusub ee sare kaasoo sanadkii labaad ay ardo ka qalin jabinayso, Waxaana Kormeer kadib ay Hoolka shirarka ee Dugsigaas kula kulmeen Maamulka Iyo Ardayda wax kabarata Dugsigaas oo ay kala hadleen sidii Waxbarashada loosii kordhin lahaa, Iyadoo Wasiirka Haweenka ee Puntland-na ay Ardaydaas u balan qaaday inay soo gaarsiin doonto Buugaag ka hadlaya hogaaminta wanaagsan oo ay iyadu qortay.
Waxay Xubnaha Waftigu kormeereen Xarunta saldhiga ee Bursalaax oo imika qabyo ah, Dugsiyo kale, Xarunta degmada, Suuqa Haweenka Iyo goobo kale oo muhiim ah markii danbena waxay shirweyne balaaran la qaateen qaybaha maamulka, Dhalinyarada, Cuqaasha Iyo Waxgaradka Bursalaax kuwaas oo dawlada Puntland ku sheegey inaysan ku dadaalin inay wax tarto dadka Bursalaax iyagoo ku celceliyey in xataa Saanta maamulku ay Bursaalax ku yartaha, Waxayna Dhanka kale sheegeen in ay baahiyaha ugu daran ee deegaankaas ka jira yihiin Saldhiga Booliska oo qabyo ah taageerana ka raba dawlada, taageerista Isboortiga Iyo Waxyaabaha asaasiga u ah Nolosha, waxaana shirkaas kadib Waftigu ay u gudbeen meelo kale oo kamid ah dhulka Miyiga ah taasoo qayb ka ah kormeero ay Wasaarada haweenku ku samaynayso meelo badan oo kamid dhulka aanan helin taageerada dawlada ee Laamiga ka baxsan si loo ogaado baahiyaha Bulshada.
