Ciidamada amniga ee deegaanka Garacad ayaa maanta soo afmeeray hawlgalo ay kula dagaalamayeen kooxo Burcad-badeed ah oo isku dayey in ay ka duullaan tagaan deegaanka Garacad iyo deegaano kale oo hoostaga degmada Jariiban ee gobolka Mudug.
Hawlgalkan oo socday mudo asbuuc ah ayaa waxaa laga fuliyay 165 km oo ah xeebaha hoostaga degmada Jariiban ee gobolka Mudug, waxaana lagu soo qabtay kooxo Burcad-badeed ah oo doonayey inay weeraraan maraakiibta ganacsiga ee gooshaha marin biyoodyada caalamiga ah ee Soomaaliya u dhow.
Taliyaha ciidamada ammaanka ee degmada Jariiban G/sare Jaamac Maxamuud Baydan oo hogaaminayey hawlgalkan ayaa warbaahinta Horseed Media xafiiskeeda gobolka Mudug u xaqiijiyey in la soo afmeeray hawlgalkan oo socday in mudo ah, waxaana uu sheegay in ay ku guulaysteen soo afjarida dhaq-dhaqaaqyadii ay Burcad-badeedu wadeen.
Taliye Baydan waxa kaloo uu sheegay in hawlgalkan lagu soo qabtay 43-nin oo Burcad-badeeda ka tirsan , haatana lagu hayo saldhigga dhexe ee Booliska deegaanka Garacad dhowaanna loo gudbin doono degmada Jariiban si halkaas loogu maxkamadeeyo.
Ciidamada amaanka ayaa sidoo kale waxa ay la Wareegeen qalabkii ay raggaasi wateen oo iskugu jiray doonyaha dheereeya iyo hubka noocyadiisa kala Duwan, waxaa kaloo ciidanku ay gacanta ku dhigeen gaadiid iyo agab kale oo ay kooxahaasi ku duulan tegi lahaayeen.
HUTUS been caught
Sidoo kale intii uu socday hawlgalkan waxaa ciidamadu ay (Bandoo) ku soo rogeen Garacad oo laga baadi goobayey qaar ka mid ah kooxaha Burcad-badeeda oo ku soo dhuuntay halkaas,waxaana markii danbe ay ciidanku ku guulaysten in ay gacanta kusoo dhigaan.
Maamulka iyo odayaasha degmada Jariiban ayaa u istaagay la dagaalanka kooxaha Burcad-badeeda ah oo dhibaato ku haya amaanka deegaanka ,waxaana haatan ka socda Garacad shirar looga arinsayo sidii gabi ahaanba deegaanadaas Burcad-badeeda oo dunida oo dhan laga canbaareeyey looga cirib tiri lahaa.
