Puntland oo beenisay in banaanbax uu ka dhacay Magaalada Qardho
Wasiir ku xigeenka Wasaarada Arimaha Gudaha iyo DOwldaha Hoose ee Puntland Cali Axmed Cali Xoosh ayaa warbaahinta SBC International u sheegay inay been abuur tahay wararka sheegay in banaanbax uu ka dhacay Magaalada Qardho oo uu safar shaqo ku joogo madaxweynaha Puntland C/raxmaan Sheekh Maxamed .
Mr Cali Xoosh ayaa ku eedeyay Mid ka mid ah Idaacadaha Afsoomaaliga ee Caalamiga ah ay shalay siideysay war sal iyo raad aan lahayn oo ku aadan in Magaalada qardho uu ka dhacay dibad bax looga soo horjeedo Madaxweynaha Puntland waxaana wasiirka uu sheegay inaysan haba yaraatee jirin wax dibad bax ah oo magaalada ka dhacay.
Wasiir ku xigeenka Arimaha Gudaha ayaa xusay in Wefdiga Madaxweynaha Puntland ee Shalay soo gaaray Magaalada Qardho ay kormeero ku sameeyeen qeybo kala duwan oo magaalada ah islamarkaaina aysan jirin wax dibad bax ah oo halkaas ka dhacay wuxuu xusay in warkaasi uu yahay war ay sameeyeen dad uu ku tilmaamay warxuma tashiil.
Dhinaca kale duqa Magaalada Qardho Maxamed Siciid Hogaamo ayaa sheegay in shalay ay la soo xiriireen Wariyaal ka tirsan Laanta Afka Soomaaliga ee VOA-da kadiba uu u sheegay inaysan Jirin wax dibad bax ah oo ka dhacay qardho waxaana uu sheegay in ka dib uu ku maqlay warka idaacada in dibad bax uu ka dhacay Qardho .
Duqa qardho ayaa kula dardaarmay Maamulka Idaacadaas inay ka fiirsadaan wararka sal iyo raadka aan lahayn oo u sheegay inay ka xiganayaan dad ka soo horjeeda Danaha Maamulka Puntland .
Mr Hogaamo ayaa xusay dhanka kale inaysan jirin sabab ay dadka reer qardho u dibad bixi karaan waxaa uu xusay in shalay iyo maantaba magaalada ay ku jirto jawi xasiloon kaasi ah in Gudaha Magaalada uu ku sugan yahay madaxweynaha Puntland iyo wefdi la socda oo ka tirsan Golayaasha Dowlada Puntland.
Madaxweynaha Puntland C/raxmaan faroole ayaa howlo shaqo u jooga Magaalada Qardho weli lama shaacin booqashada madaxweynaha waqtiga ay ku egtahay waase uu madaxweynaha weli kulamo xiriir ah la leeyahay masuuliyiinta Gobolka, Degmada iyo sidoo kale Cuqaasha Gobolka Karkaar.
