Faah faahin dheeraad ah oo ku saabsan dagaal maanta ka dhacay magaalada Baladweyne.
waxaa la daabacay Mon 20 Apr 2009 09: 38: 44
Ilaa iyo 9 ruux ayaa ku dhimatay 32 kalana waa ay ku dhaawacantay inta la og yahay Dagaal xoogan oo mudo saacado ah ka soday gudaha Magaalada Baledweyne, kaas oo u dhaxeeya Maamulka Maxkamadaha Islaamka ee Gobolka Hiiraan iyo Ururka Xisbul-islaam.
Dagaalkaan oo ahaa mid hubka nuucyadiisa laysku adeegsaday walina socda ayaa waxaa Dadka ku dhintay iyo kuwa ku dhaawacmay la geeyay Isbitaalada ku yaala gudaha Magaalada Baledweyne.
Isbitaalka Hiiran Voluntary Hospital ee Galbeedka Magaalada ayaa sida la ii sheegay waxaa la gaarsiiyay 4- ruux oo meyd ah iyo ilaa 23 ruux oo dhaawac ah, kuwaasoo isugu jira dhinacyada Dagaalamayay iyo dad rayid ah halka Isbitaalka Guud ee Magaalada oo ay gacanta ku hayso Hay’adda MSF Swiss la soo gaarsiiyay 5-qof oo meyd ah iyo 9-ruux oo dhaawac ah waxaa la ii sheegay in wali la soo gaarsiinayo Isbitalaada Dad dhaawac ah oo ku xayirmay xaafadaha ay Dagaaladu wali ka socdaan, inkastoo Dad kaloo ku dhintay rasaasta labada dhinac oo ciidamada iyo rayid isugu jiro ay jiraan.
Dagaaladaan ayaa waxaa cambaareyay Culimaa’udiinka ku dhaqan Gobolka waxayna Labada dhinac ugu baaqeen in la joojiyo xabada si loo baajiyo dhiiga Umada Muslimiinta ah iyo in aan la sii badin dhibaatada Dadka shacabka ah ee qasaaraha ugu weyn uu ka soo gaaray Dagaalkan.
Sikastaba iska hor-imaadkan xoogan ayaa qasaaro weyn u geysta Dadka rayidka ah ee ku Nool gudaha Magaalada Baledweyne iyadoo uu sababay in Dadka ay isku gudbi waayaan wax Ganacsi ahna la furi waayo warar haatan nasoo gaarana waxay sheegayaan in dagaalka ay ku soo biireen Alshabaab oo la safan Ururka Xizbul Islaamka sheegta.
Xafiiska Wararka Almaxaakim.com
