How can they help shabaab in this war started by them after many of their commanders killed by these people.
Dagaallo maalintii labaad ka socda Magaalada Muqdisho oo geystay khasaare aad u faro badan
Khamiis, Mar 11, 2010 (HOL) - Dagaallo kale oo maanta ka dhacay Magaalada Muqdisho una dhexeeyay Xarrakatul Shabaabul Mujaahidiin iyo Xisbul Islaam oo isku dhinac ah iyo ciidamada Dowladda oo kaashanaya kuwa AMISOM, ayaa waxaa ku dhintay 20-qof, iyadoo ay ku dhaawacmeen 60-qof oo kale.
Madaafiic ku dhacay xaafado ka tirsan xaafado ka tirsan Degmooyinka Kaaraan iyo Yaaqshiid ayaa waxay sababeen dhimasho iyo dhaawac soo gaaray dad rayid ah, kuwaasi oo isugu jiray dad waa weyn iyo caruur aad u yar yar.
"Waxaan saaka arkay dhimashada iyo dhaawaca dad badan oo ay ku jiraan caruur iyo haween, dhowr madfac ayaa kusoo dhacay xaafaddeena, waxaaba saaka ka bilowday barokac" ayay tiri Siciido Axmed oo ka mid ah dadkii maanta ka barokacay xaafadda Arjantiin ee degmada Kaaraan.
Dagaalladan ayaa waxay ka bilowdeen agagaarka Hotel Global ee degmada C/casiis halkaasoo ay tan iyo shalay ku loollamayeen gacan ku hayntooda ciidamada Dowladda iyo kooxaha kasoo horjeeda iyadoo dhowr jeer ay dhinacyadu kala qabsadeen.
Taangiyada ay wataan ciidamada AMISOM ayaa lagu arkayay goobihii ay maanta ka dhaceen dagaallada gaar ahaan degmooyinka Kaaraan, C/casiis iyo Shibbis, iyadoo dagaalkaas uu ahaa mid ka xooggan kii shalay ka dhacay Muqdisho.
Madaxa gaadiidka gurmadka deg-degga ah ee Magaalada Muqdisho Cali Muuse oo saxaafadda la hadlay ayaa sheegay in dhaawacyo ka badan 60-qof ay qaadeen maanta, kuwaasoo dhamaantood ahaa rayid ah.
Guud ahaan dagaalladii ka dhacay Muqdisho shalay iyo maanta ayaa waxaa ku dhintay ugu yaraan 44-qof iyadoo ay ku dhaawacmeen 140-qof oo dhamaantood ahaa rayid, lamana oga khasaaraha ramsiga ah ee kala gaaray labada dhinac.
