Maamulka Xarrakatul Shabaab ee Degmada Baardheere oo mamnuucay in dadku ay googoostaan dhulka daaqsinka ah
Sabti, May 01, 2010 (HOL) - Maamulka Degmad Baardheere ee Xarrakatul Shabaabul Mujaahidiin ayaa soo saaray amar lagu diiday in dhulka daaqsinka ku wanaagsan ay dadku kala oogtaan, iyagoo sheegay inaan la ogolaan doonin arrintaas lana ciqaabi doono qofkii lagu helo.
Mas'uuliyiinta maamulka ayaa sheegay in kala xirashada dhulka ay dhibaato weyn ku tahay dadka xoolo dhaqatada ah, sidaa daraadeedna aan la oglaanayn in cid aan xoolo lahayn iyo kuwo xoolo lehba ay dhulka qayb ka mid ah xirtaan.
"Waxaan uga digaynaa dadka ku mashquulsan xirashada dhulka daaqsinka ku wanaagsan ee ka durugsan Degmada Baardheere inay joojiyaan arrintaas, ciddii ka hortimaada waxay la kulmi doontaa ciqaab" ayuu yiri Madaxa Ammaanka ee Degmada Baardheere Sheekh C/llaahi Cabdi Daahir oo saxaafadda la hadlay.
Sarkaalkan wuxuu sheegay in xilliyada roobabku da'aan ay dadku bilaabaan inay ootaan dhul ballaaran oo ay kobciyaan cowska ka baxa si ay u iibsadaan marka abaaraha la gaaro xilliyada abaaraha, taasoo uu ku tilmaamay macaash xaaraan ah.
Dadweynaha ku nool Degmada Baardheere ee Gobolka Gedo oo isugu jira xoolaley iyo dad aan xoolo lahayn ayaa ku mashquula marka ay roobabku da'aan inay ootaan dhul ballaaran, si ay uga faa'iideystaan cowdka ka baxa marka ay roobabku dhamaadaan.
Ma ahan markii ugu horreysay oo maamulka Xarrakatul Shabaab ee Degmada Baardheere ay soo saaraan amarro ku wajahan dadka degmadaas ku dhaqan, waxaase bilowgii bishii dhamaatay lasoo saaray amar lagu baabi'inayo beeraha ay ka baxdo Tobaakada ee ku yaalla degmadaas.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya
