Barline: (Sh. M. Network) Mudane ka tirsan Barlamanka KMG Soomaaliya oo caawa la soo xariiray Shabakadda Warbaahinta Shabelle ayaa iska casilay xiulkii uu u hayay Barlamanka KMG Soomaaliya sababo uu ku sheegay in dalka wax laga qaban waayay.
Yuusuf Maxamed Kheyr (Guuraaw) oo ka mid ahaa mudanayaasha Barlamanka KMG Soomaaliya oo Caawa qadka taleefanka kula hadlayay Shabakadda Warbaahinta Shabelle isagoo ku sugan dalka Jarmalka ayaa waxaa uu sheegay in uu iska casilay xilkii uu u hayay Barlamanka KMG Soomaaliya.
“Waxaan rabaa in aan iska casilo xilka xubinimada baarlamaanka sababo la xiriira caafimaadkeyga oo aan wanaagsaneyn iyo aniga oo howshii wadanka iskaga maqnaan Karin iyadoo howl la iska rabo”
“Istiqaaladii waan gudbiyey waxaana jira dad badan oo aan telefoon ku wada gaari Karin in aan hawada u mariyo codkeyga iyo in aan u rajeeyo dalka nabadgeliyo iyo xasilooni kuna cadeeyo in Iscasilaadeyda wax siyaasad ama khilaaf ah lug ku laheyn” ayuu yiri Yuusuf Maxamed Kheyr.
Mr Kheyre oo sii hadlaya ayaa yiri “Mudo sanad iyo bar dhan ayaa waxaan iminka joogaa wadanka Jarmalka xaalad caafimaad owgeed, maadaama aan mararna safar ku aadey gudaha dalka laakiin si joogto ah uma soo joogin, weli xaaladihii caafimaadka iima dhamaanin, mudadii aan maqnaana aad ayey u badatey”
Dhinaca kale xildhibaanka ayaa ka hadlay abaalmarintii dhawaan ay ku guuleysatay Shabakadda Warbaahinta Shabelle isagoo yiri “Maadaama Radio shabeele uu yahay raadiyaha ku guuleeystey mid ugu fiican 2010 Caalamka waxaan rabaa in aan hambalyadeyda ku daro”
Aqriso taariikhda xildhibaanka is casilay hoos
Waxaan ka mid ahaa aas aasiyaashii ururkii RRA, waxaana ku jiray gudigii fulinta laga soo bilaabo 1995 ilaa dhismihii dowlada TFG, markaas oo aan ku biirney dowladii TFG ee maxadweyne Abdullahi Yuusuf Ahmed,
Waxaan ahaa gudoomiyaha gobolka Bakool laga soo bilaabo 2000-2003 ilaa waqtigii dowlada TFG laga dhisey wadanka Kenya kuna soo wereegtey Baydhabo, waxaan ka mid ahaa wasiir ku xigeenadii golihii wasiirada R/wasaare Cali Maxamed Geedi, wasiir ku xigeenka wasaarada iskaashiga iyo horumarinta gobolada ilaa is casilaadii Prof Cali Maxamed Geedi
Xilalka aan ka soo qabtey gudiyada gudaha golaha baarlamaanka waxaa ka mid ahaa, waxaan ka tirsanaa gudiga baarlamaanka ee nabadgalyada iyo amaanka oo aan xubin ka ahaa, waxaan kaloo Xubin ka ahaa ururka ban Afric parliament u qaabilsan xaga baarlamaanka Soomaalida.
Aqriso oo la soco Shabelle.net Saacad Walba si aad u hesho wararkii ugu dambeeyay ee Soomaaliya.
