Shabaab oo gacanta ku dhigay Wasiiradda Haweenka ee Xukuumadda KMG
Balcad: (Sh. M. Network) Ciidamo ka tirsan Xarakada Al Shabaab ayaa gacanta ku dhigay mid ka mid ah Wasiirada cusub oo uu xalay magacaabay Ra’iisul wasaare C/wali Max’ed Cali.
Wararka imaanaya degmada Balcad ee gobolka Sh/dhexe ayaa waxaa ay sheegayaan in Ciidamo ka tirsan Al Shabaab ay gacanta ku dhigeen Wasiiradda Haweenka iyo arimaha qoyska Marwo Caasho Cismaan Caqiil oo ka mid aheyd Golahii wasiirada oo uu xalay magacaabay Ra’iisul wasaare C/wali Max’ed Cali.
Marwo Caasho Cismaan Caqiil ayaa la tilmaamay in Al Shabaab ay gacanta ku dhigeen xili ay doonaysay inay kasoo baxdo degmada Balcad, waxaana la sheegay in Al Shabaab ay kala dageen gaari ay saarneyd oo kusoo jeeday Magaalada Muqdisho, iyadoo aan la’ogayn ilaa iyo iminka halka ay la aadeen.
Sida ay Idaacadda Shabelle u xaqiijiyeen dad ku sugan degmada Balcad oo diiday in magacooda la shaaciyo iyo Xildhibaano ka tirsan barlamanka KMG Soomaaliya ayaa waxaa ay sheegeen in ilaa iyo iminka wax war ah laga la’yahay Marwo Caasho Cismaan Caqiil oo dowladda KMG u magacawday Wasiiradda Haweenka iyo arimaha Qoyska.
Majiraan wax war ah oo kasoo baxay Saraakiisha Xarakada Al Shabaab oo ku aadan arintaani hase ahaatee xalay ayay aheyd markii markii Ra’iisul wasaaraha Xukuumadda KMG Soomaaliya uu ku dhawaaqay Golahiisa Wasiirada kuwaasi oo ay ka mid aheyd Marwo Caasho Cismaan Caqiil.
Ma’ahan markii ugu horeysay oo dowladda KMG ah Soomaaliya ay xilal u magaacwo dadka ku sugan deegaanada ay gacanta ku hayaan Xarakada Al Shabaab, iyadoo la sheegay in Marwo Caasho Cismaan Caqiil Saygeeda 3-bil ka hor ay Ciidamo ka tirsan Xarakada Al Shabaab ay ku dileen degmada Jowhar ee gobolka Sh/dhexe.
Aqriso oo la soco Shabelle.net Saacad Walba si aad u hesho wararkii ugu dambeeyay ee Soomaaliya.
NALA SOO XARIIR webmaster@shabelle.net
