Madaxweyne Siilaanyo Oo Maanta Markii Ugu Horaysay Muddadii Sanadka Ahayd Ee Uu Xilka Hayey U Socdaali Doona Boorama Iyo Ujeedooyinka Uu Salka Ku Hayo Safarkiisu
Madaxweynuhu Waxa Uu Ka Qayb Gali Doonaa Munaasibada Qalinjabinta Ardayda Jaamacada Camuud, Kulanona Uu La Yeelan Doono Odayaasha Iyo Waxgaradka Awdal
Hargeysa, July 28, 2011 (Haatuf) - Madaxweynaha Somaliland Axmed Maxamed Maxamuud Siilaanyo ayaa la filayaa inuu maanta socdaal ugu kicitimo magaalo Madaxda gobolka Awdal ee Boorama oo ay ugu dambaysay xiligii ololaha doorashada Madaxtooyada ee dalka ka qabsoontay 26-kii June 2010-kii.
Madaxweyne Siilaanyo ayaa ujeedooyinka safarkiisa uu ku tagi doono Boorama ayaa la sheegay inuu ka qayb gali doono xaflad qalin jabin ah oo loo samayn doono Arday dhamaysatay waxbarashada Jaamacada Camuud ee gobolka Awdal, isla markaana Madaxweynuhu waxa uu kulano la qaadan doonaa Madxdhaqameedyada iyo waxgaradka gobolka Awdal oo la filayo inay ka wada hadlaan xaalada guud ee wakhtigan xaadirka ah dalku marayo iyo guud ahaanba duruufaha kala duwan ee dalka ku gedaaman, inkastoo xiligii xukuumadda Siilaanyo oo hadda Gu’ jirsatay ay bilawgeedii ay talada dalka la wareegeen ay deegaanadaasi Awdal ay kala horyimaadeen dareeno saluug leh oo ku wajahan Dhinaca Saami qaybsiga xukuumadda iyo Mansabyada ay heleen.
Madaxweyne Siilaanyo iyo Weftiga uu hogaamin doono ee socdaalka ugu bixi doona Boorama ayaa la sheegay inuu soo noqodkiisa ku hakan doono magaalada Gabilay, halkaas oo ay sidoo kale kulamo kula yeelan doonaan saraakiisha dawladda ee gobolka iyo hogaamiyeyaasha dhaqanka ee deegaankaasi ka hor inta aanu ku soo* noqon caasimada dalka ee Hargeysa.
Madaxweyne Siilaanyo ayaa safarkiisani uu noqonayaa gobolkii labaad ee uu muddadaa sanadka ah ee uu xilka hayey ku tago, kaas oo hore socdaalo ugu tagay magaalo madaxda gobolka Saaxil ee Barbara, Awdalna ay noqon doonto gobolkii labaad ee uuu booqdo, inkasta oo Madaxweyne ilaa iyo hadda aanu socdaal ugu kicitimin gobolka uu ka soo jeedo ee Togdheer muddadaa sanadka ah ee uu xilka hayey, iyadoo ay ugu dambaysay xiligii uu ololah eeh doorashada lugu jiray.