Shirka wadatshiga Soomaaliya waxaa lagu qaban magaalada Muqdisho
Shirka wadatashiga arrimaha Soomaaliya ee muddooyinkii la soo dhaafey la isku khilaafsanaa halka lagu qabanaayo ayaa hadda si rasmi ah u soo baxay goorta iyo goobta lagu qabanaayo.
Shirkii golaha amaanka ee maalintii shalay ka dhacay magaalada New York ee looga hadley xaaladda Soomaaliya isla markaana laga akhriyey warqad uu u direy Dr.Augustine Mahiga ayaa lagu sheegay in shirkaas la qaban doono 4 – 6 bisha Septmeber taas oo maalmo ay ka dhiman yihiin, waxaana shirku ka dhacayaa magaalada Muqdisho.
Sida ku qoran khdubada Dr. Mahiga shalay oo uu booqdey magaalada Muqdisho ayuu kala hadley Raysalwasaaraha Soomaalida Dr.Cabdiweli Cali ajendaha shirka iyo sida loo maareynaayo.
Shirka ayaa lagu sameynaayaa Dhabaha dawladda soomaaliya ay uga gudbi doonto nidaamka kumeelgaarka ah, iyo hawlaha la qabanaayo 12 bilood ee soo socda.
Kadib bixitaankii al-shabaab iyo guulihii ay gaareen ciidanka dawladda iyo AMISOM waxaa hal mar isbedalay xaaladda magaalada Muqdisho, taas oo ka dhigeysa meel ay Dawladda keliya ka taliso.
Maamulka Puntland ayaa dedaal dheer ku bixiyey in shirkaas lagu qabto magaalada Garowe, Madaxweynaha Puntland ayaa kulan uu magaalada Nayroobi kula yeeshay kuxigeenka Dr.Mahiga hadda kahor sheegay in shirka lagu qabanaayo magaalada Garowe, ayna mabda ahaan isla qaateen sarkaalkaas laakiin aysan ahayn go’aankii u danbeeyey.
Todobaadkii la soo dhaafey ayaa Dr.Mahiga gaarey magaalada Garowe si uu maamulka Puntland ugu qanciyo in shirka lagu qabto caasimadda Soomaaliya isla markaaana ay ka soo qaybgalaan, warar ku agdhaw kulankaas ayaa sheegaya in uu ka duwanaa kulamadii maamulka Puntland la yeelan jirey Dr.Mahiga waxaana muuqata in Ergayga Qaramada Midoobey u qaabilsan Soomaaliya iyo Puntland xiriirkoodi mad-madow soo galay.
Ma cadda in Madaxweynaha Puntland uu tegi doono shirka iyo in uu u diri doono wefdi heerkoodu hooseeyo.
Horseed Media
