Dagaal xooggan oo ka qarxay deegaanka Taabto ee Gobolka Jubbada Hoose Khamiis, Oktoobar 13, 2011 (HOL) — Waraka aynu ka heleyno deegaanka Taabto ee hoostaga degmada Afmadow ee gobolka Jubbada hoose ayaa sheegaya inuu halkaasi ka qarxay dagaal aad u xoogan uu dhexeeyay ciidamada dowladda iyo ururka Raaskaambooni oo isku dhinac ah iyo xoogagga Xarakada Al-shabaab.
Dagaalka ayaa la sheegay ina y qaadeen ciidamada dowladda iyo kuwa ururka Raaskaambooni oo iyagu mudooyinkan danbe halkaasi ka waday dhaqdhaqaaqyo ciidan oo aad u xoogan, waxaana la sheegay in dagaalku uu yahay mid aad u adag, islamarkaasina la isu adeegsanayo madaafiic iyo hub aad u culculus.
Mid kamid ah dadka ku dhaqan deegaanka Dhoobley ee Gobolka J/hoose oo aan qadka teleefonka kula xiriirnay ayaa inoo xaqiijiyay dagaalka, isagoona sheegay in dagaalku uu bilowday saaka aroorti, ilaa iyo imikana uu dagaalku socdo.
Ma jiraan masuuliyiin ka tirsan dhinacyada dagaallamaya oo ka hadlay dagaalka , haseyeeshee afhayeenka ururka Raaskaambooni C/naasir Seeraar oo isagu isbuucan gudihiisa saxaafadda la hadlay ayaa sheegay in ay wadaan qorsheyaal ay kudoonayaan inay Xoogaga Al-Shabaab uga saaraan gobollada Jubooyinka.
Wixii kusoo kordha dagaalladaasi dib ayaan idinka soo gudbin doonaa Insha’allah.
Xasan Nuur, Hiiraan Online
hnur@hiiraan.com
Kismaayo, Soomaaliya
