Kulan ay ka wada qayb galeen wasiiro Somaliland ah iyo masuuliyiin ka tirsan xukumada Shiikh Shariif
Written by Qaran news
Weftiga ka socda xukuumada Somaliland ee ku sugan magaalada Ceerigaabo oo xubno ka yihiin wasiirka arimaha gudaha Maxamed Caraale Duur, wasiirka warfaafinta Axmed Cabdi Xaabsade, taliyaha ciidanka asluubta Somaliland Mr Xiirane, Maxamed Kaahin Axmed (wasiirka qarsoon ee amniga qaranka) iyo xubno kale ayaa shalay la kulmay oday dhaqameedyada beesha Naalaye Axmed (Dhulbahante) oo ka mid ah beelaha reer Sanaag ee aanadu dhextaalo oo ay wehelinayeen siyaasiin ka tirsan xukumada Shiikh Shariif.
Kulankan shalay oo si wanaagsan u qabsoomay ayey dhinaca oday dhaqameedyada Naalaye Axmed kulankoodaa ku weheliyeen laba xubnood oo ka tirsan dawlada Federalka ee Somaliya (TFG) ee Shiikh Shariif madaxweynaha u yahay, labadaas xubnood oo kala ahaa Cali Maxamuud Shire Cali Baashe oo ka tirsan Barlamaanka TFG-ga iyo Maxamed Xasan oo ah la taliyaha wasiirka difaaca ee dawlada Shiikh Shariif.
Cali Baashe oo ka hadlay kulanka ayaan qarsan ujeedada socodkooda wuxuuna sheegay inuu ka soo kicitamay magaalada Nairobi una yimi sidii uu gacan uga gaysan lahaa shaqaaqada ka dhacday Ceerigaabo sidan ilo xogogaala ka helayna isaga iyo sarkaal kaleba waxay u metelayaan wadahadalada dawlada Shiikh Shariif. Cali Baashe wuxuu ka mid yahay Xildhibaanada dawlada TFG-ga u metela ama ugu jira gobolka Sanaag.
Weli ma cada in Xildhibaan Cali Baashe iyo xukuumada Somaliland xidhiidh hoose ka dhexeeyo maadaba uu wadahadalo badan kala qeyb galay wasiirada isagoo metelaaya xukumada Shiikh Shariif. dhinaca kale wasiirada xukumada Somaliland ee kulanka ka hadlay iyo Cali Baashe ayaa dhinacba dhinaca kale amaan aan loo meel dayin huwiyey dhinaca kale kuna amaanay kaalintu ka qaatey iskukeenidooda iyo suurtogelinta wadahadaladaba. Wasiir Duur ayaa ku celceliyey inuu ku faraxsan yahay goobjoognimada Cali Baashe Ceerigaabo joogo iyo kulankan u kala weyb qaatey soona dhaweynaayo taasina waxay markhaati cad u noqonaysaa in xukumada Shiikh Shariif iyo xukumada Siilaanyo isku milmeen oo tuhunka dad badani qabaan tanina daliil cad u tahay.
Waxa kale oo iyana arrintani muujinaysaa in imminka Somaliland tahay maamul goboleed la mid ah Puntland iyo Xamar mar haddii masuuliyiinta Somaliland iyo Somaliya ay imminka si wada jir ah uga qayb qaadanayaan arrimaha ka dhaca Somaliland gudaheeda sida arrinta ka dhacday Ceerigaabo. Kulamadan noocan ah ayaa bilaabmay ilaa maalintii xukuumada Siilaanyo talada la wareegtay oo ay si toos ah uga qayb gashay shirarka Somaliya sida kii London iyo Keeniya. Shacabka Somaliland bay arrintani u taalaa inay kala xisaabtamaan xukuumada Siilaanyo ee dadka riyada ku maaweelinaysa, Somaliland mise maamul goboleed ka mid ah Somaliya?
Ali Adan Cilmi
Qaran news
Burao
@ TFG - did Amisom accompany them?
