Waxaa magaalada Boosaaso todobaadkii 3-aad ka soconaya dayactir balaaran oo lagu wado qaar kamid ah wadooyinka waaweyn.
Mashaariicda wadooyinkan lagu dayactirayo oo ay dhowaan si wada jir ah u fureen maamulka gobolka iyo kan degmada Boosaaso ayaa qayb ka ah barnaamijka horumarinta ee JPLG oo ka shaqeeyo 7-degmo oo Puntland ka tirsan.
Jidadka laga shaqeynayo oo ay tiradoodu 4 tahay ayaa waxaa hada gacanta lagu hayaa 2 kamid ah oo kala ah wadada isku xirta Airport-ka iyo xarunta dowlada hoose ee degmada, iyo wadada ka tagta suuqa caanaha ee aada dhinaca aqalka madaxtooyada.
Gaadiid waaweyn oo cagafyo iyo Rulers isugu jira iyo weliba shaqaale badan oo dayactirka wadooyinkaas ku howlan ayaa qaybo badan oo magaalada kamid ah lagu arki karaa, waxaana xusid mudan in howshani ay tahay mid Bulshada Boosaaso ku dhaqani ay si aad ah u soo dhoweysey.
Dhinaca kale waxaa si habsami leh u socda qorshe ay wadaan guddiga horumarinta degmada Boosaaso oo kaashanaya waxgaradka, iyo ganacsatada kuna aadan sidii wadooyinkan oo jid-cadeyaal siman laga dhigayo Laami loo saari lahaa, bulshaduna ay arintaas uga qayb qaadan lahaayeen, dhaqaalena looga uruurin lahaa.
13-kii bishii Dec ee sanadkii lasoo dhaafay ee 2011 ayey ahayd markii ay magaalada Boosaaso ka dhacday munaasabad balaaran oo lagu dhagax dhigayey 4-mashruuc oo lagu dayactirado 4-kamid ah wadooyinka waaweyn ee magaalada Boosaaso dhex mara, waxaana la filayaa in marka dayactirka jidadkan lasoo gaba gabeeyo isbedel weyn laga dareemo isu socodka dadka iyo gaadiidka ee gudaha magaalada Boosaaso oo iyadu xudun u ah dhaqaalaha iyo ganacsiga guud ahaan deegaanada Puntland.