Khamiis, Janaayo 02, 2014 (HOL) — Axmed Cilmi Cismaan (Garaash) oo ka mid ahaa madaxweynayaasha maamulka Khaatumo oo maanta soo gaaray magaalaa Garoowe ee xarunta Puntland halkaasoo lagu soo dhaweeyay.
Soo dhaweynta siyaasigan waxaa ka qayb qaatay maamulka gobalka Nugaal, wasiirro iyo qaar ka mid ah xildhibaannada cusub ee baarlamaanka Puntland. Axmed Garaash, waxaa socdalkiisa ku waheliyey, cuqaal iyo qaybaha kala duwan ee bulshada ku nool deegaannada uu ka yimid.
Mar uu ka hadlayay siyaasigan socdalkiisa uu Garoowe kusoo gaaray, isagoo horey uga mid ahaa mas'uuliyinta maamulka Khatuumo oo sheegay inay ka go'aan Puntland ayna yihiin laba maamul oo daris ah ayaa sheegay inuu la xiriiro imaatinkiisa hilow uu u qabo dhulkiisa, wuxuuna intaas ku daray inay isku mid yihiin Puntland iyo Khaatumo, balse wuxuu hadalkaa daba dhigay inay jiraan xubno kale uu u ku tilmaamay khiyaamo.
"Puntland iyo Khaatumo waa isku mid, waxaana jira rag khiyaano ah oo doonaya shacabka Puntland inay sii kala fogeeyaan," ayuu yiri Axmed Garaash.
Intaas kaddib waxaa uu gaaray xarunta madaxtooyada Puntland oo uu xilligaa ku sugna madaxweyne C/rixmaan Faroole,madaxweynha ayaana sheegey inuu soo dhaweynayo, isagoona ku tilmaamay Axmed Garaash inuu yahay siyaasi miisaan ku leh Puntland.
"Waan soo dhaweynaynaa Axmed Garaash, horay wax yar oo aan ku dheeraneyn baa lugu kala durugsana, balse waa siyaasi miisan ku leh Puntland," ayuu yiri madaxweyne Faroole.
Dhinaca kale, warar aan wali la xaqiijin oo soo baxay ka gadaal socdalka uu Axmed Garaash ku yimid Garoowe ayaa sheegaya in maalmaha soo socda uu siyaasigan ku dhawaaqi doono inuu ka mid noqon doonno musharrixinta u tartamaya xilka madaxweyne ku-xigeenka Puntland.
