Warar dheeraad ah ka soo baxaya weerar caawa fiidkii Hay'adda Nabad sugida ku qaatay guriga Xildhibaan Cabdiweli Maxaxamed Qanyare oo gurigiisa uu ku sugnaa Cabdi Nuure Siyaas oo loo yaqaan Cabdi Waal.
Xiligii weerarkaan uu dhacayay ayaa waxaa guriga Xildhibaanka la joogay Cabdi Waal oo ciidamo ilaalineysay, kuwaasi oo mar qura rasaas kala kulmay ciidamada Nabadsugida oo si gaadmo ah goobta u tagtay, waxayna la kulmeen iska caabin xoogan.
Dagaalka ayaa waxaa si wada jir ah ugu qeyb qaatay ilaalada Xildhibaan Cabdiweli oo guriga la wareeray deganaa ilaalada Cabdi Waal oo ay isla joogeen iyo kuwa Hotel JAziira oo moodayay in la soo weeraray.
Hoyga Xildhibaanka oo dacalka ku haaya Hotel Jazeera, ayaa waxay taasi dhalisay inay dib u gurtaan Ciidanka Nabad Suggida, iyadoo loo diiday in ay gudaha u soo galaan hoyga Xildhibaanka.
Ujeedada ay u weerareen guriga Xildhibaanka ayaa aheyd in ay ka kaxeystaan Cabdiwaal, hase ahaatee ay ku fashilmeen nabadsugida.
Xildhibaan C/weli Maxamed Qanyare, ayaa si kulul uga hadlay weerarka hoygiisa lagu soo qaaday, wuxuuna Nabad Suggida ku eedeeyay in ay argagaxiso tahay, sida uu yiri
"Markii hore waxaan u maleynaayay waxa na soo weeraray in ay argagaxisadu tahay, laakiin waxaan ogaanay in Nabad Suggidu tahay, iyadaana argagaxisada la sheegaayo ah." ayuu yiri Xildhibaan C/weli Maxamed Qanyare.
Xildhibaanka oo u waramay Idaacada SKY NEWS ee Magaalada Muqdisho, ayaa waxa uu weerarkaan ku macneeyay qorshe lagu doonaayay in isaga lagu dilo, balse uu fashilmay
"Isku-day dil buu ahaa oo lagu doonaayay in aniga la'igu dilo, waa lagu marmarsiyoonayaa Cabdi Waal. Haddii la rabo Cabdi Waal maxaa gurigiisa loogu taggi waayay?" ayuu yiri Xildhibaan C/weli Maxamed Qanyare
C/weli, ayaa qaba in ay khalad tahay in la weeraro dhisme uu degan yahay Mudane ka tirsan Baarlamaanka Somaliya, iyadoo uu su'aal ka keenay waxa laga doonaayo, oo loogu socdo.
"Waa arrin khalad ah in la weeraro guri uu degan yahay Xildhibaan, xataa lama baari karo, maxaa laga rabaa oo laga baarayaa? Anigu ma waxaan heystaa hub aan ahayn midka aan isku ilaaliyo?." ayuu si adag u yiri C/weli, oo uu dhalay Siyaasiga Maxamed Qanyare Afrax.
Dhanka kale waxaa soo baxaaya warar sheegaaya in weerarkaan uu ku dhintay Sarkaal ka tirsan Nabad Suggida, oo la oran jiray Ceydiid, halka afar kalana oo Nabad Suggida ka tirsan ay ku dhaawacantay.
Weerarkaan ayaa noqday mid Nabadsugida ay ku deg degtay in ay ku weerarto shaqsi ay doonayaan xili uu ku jiray guri Mudane Baarlamaan uu degan yahay.
Calanka.com: Isha wararka xaqiiqda
