Saldhiggii afaraad oo ay AMISOM ka baxday, Garoonka Dayniile oo ay banneeyeen - Ceelmacaan Online
Saldhiggii afaraad oo ay AMISOM ka baxday, Garoonka Dayniile oo ay banneeyeen
Waxaa La Daabacay Monday, June 29, 2015,
Ciidamada AMISOM ayaa xalay ka guuray garoonka dayuuradaha degmada dayniile ee gobolka Banaadir oo ay degenayeen sanadihii la soo dhaafay.
Qaar ka mid ah dadka degaanka ayaa sheegay iney arkayeen Ciidamada AMISOM oo saqdii dhexe ee xalay isaga guuraaya garoonkaasi oo aan la garanayn baahida ku keentay inay ka tagaan.
Ciidamada militariga dowlada Somalia ayaa isla xalay degay garoonka degmada dayniile, si uusan Al-shabaab ugu gacan gelin, iyagoo galay difaacyadii ay lahaayeen ciidamada AMISOM ee halkaas ka guuray.
Taliyaha guutada afaraad ee ciidanka XDS Jen. Maxamed Aadan ayaa si buuxdo ula wareegay gacan ku haynta Garoonka dayuuradaha dayniile kaasoo uu gacanta ku hen jiray hogaamiye kooxeedkii hore Maxamed Qanyare Afrax.
Ciidamada AMISOM ayaa sidoo kale xalay ka guuray fariisin ay ku lahaayeen degaanka Lafoole oo ka mid ah degaanada ku teedsan wadada isku xirta magaalada Muqdisho iyo degmada Afgooye.
Jahwareer xoogan ayaa ku dhacay ciidanka AMISOM tan iyo markii Jimcihii ina dhaafay ay xoogag taabacsan Al-shabaab cagta mariyeen xero milateri oo ay ku lahaayeen degaanka Leego, weerarkaas oo lagu dilay ugu yaraan 70 ka mid askarta Burundi.