Khudbadii ugu horeysay ayaa waxaa la siiyay musharax Maxamed Cabdi Waare oo ka hadlay inuu wax ka qaban doono arrimo badan sida amniga,horumarka iyo waxbarashada.
Sidoo kale,Mr Waare ayaa sheegay inuu xooga saari doono kana shaqeyn doono arrimaha horumarinta ganacsiga taasna ay tahay in xoogga la saaro dib u dhiska wadooyinka sida wadada Muqdisho iyo Jowhar,Jowhar iyo Beledweyne,Cadale iyo Xamar iyo wadooyin kale.
Mar uu soo hadal qaaday Waxbarashada ayuu sheegay inuu dhiso doono Dugsiyo farsamo uuna fududeyn doono aaladaha Xiriirka Bulshada sida internet fiber obtic ah labada gobol ay yeeshaan.
Musharax madaxwyne maamulka Hirshabeelle mudane Max’ed Cabdi Waare ayaa soo hadal qaaday arrimaha garsoorka ayuu ka hadlay in uu cadaalada xoojin doono,dhinaca waxbarashada ayuu sheegay Waare in jaamacado ka dhisi doono maamul goboleedka, Beeraha iyo kalluunka ayuu sidoo kale soo hadalqaaday in uu horumar weyn gaarsiin doono taasna loogaga bixi doono dhalinyarada shaqo la’aanta ay hayso.
Waxaa qudbadii labaad la siiyay musharax Cali Maxamed Carraale. Carraale ayaa sheegay in uu wax ka qaban doono arrimaha dib u heshiisiinta, garsoorka, ammaanka,waxbarashada,caafimaadka.
Musharax Cali Cabdulaahi Cosoble ayaa qudbadii ugu dambeysay ee Musharixiinta madaxweynaha qaatay waxana uu sheegay inuu ku dhashay Muqdisho waxna ku soo bartay magaalada muqdisho waxbarashadiisa sare dalka Maraykanka uuna soo bartay dhaqaalaha beeraha.
Cali Cabdulahi ayaa sheegay in uu dhisi doono maamul leh siyaasad cad cad isla markaana ka shaqeyn doono dhisida ciidamo karti leh, Waxa kale oo uu sheegay in uu cadaalada ku dhaqi doono diinta Islaamkana noqon doonto tan lagu xukumo labada gobol iyadoo lala kaashanayo culumada. Waxa uu sheegay inuu ka soo horjeedo ciidamada shisheeye maacmul goboleedkana ay yeelan doonaan ciidamo awood u hela ammaanka.
Dhamaan musharaxiinta khudbad jeedisay ayaa wajiyadooda laga dheehanayay kalsoonida iyo rajada ay ka filayaan doorashada iney tahay mid wanaagsan.
