Wasiirkii hore ee Arrimaha Gudaha ahna Xildhibaan ka tirsan Golaha Shacabka C/raxmaan Maxamed Xuseen (Odawaa) ayaa sheegay in midnimada iyo madax banaanida Soomaaliya ay lama taabtaan tahay, isagoo ugu baaqay Xukuumadda inay u yeerto Safiirka Imaaraadka Carabta u fadhiya Soomaaliya, si wax looga weydiiyo mowqifkooda ku aadan Midnimada Soomaaliya.
Xildhibaan Odawaa oo ka jawaabayay wareysi uu Agaasimaha DP World siiyay Warbaahinta Imaaraadka Carabta oo ahaa in Soomaaliya aanay waxba ka quseyn heshiiska Berbera ayuu ku sheegay in aan loo dulqaadan karin ku xadgudubka Midnimada iyo madax banaanida Soomaaliya.
Isagoo ka hadlayay Heshiiskii Dekeda Berbera ayuu yiri “Heshiiskan waxa uu xittaa xadgudub ku yahay maamulka Somaliland oo dekaddii ay maamulayeen ka qaatay saami dhan 31%, intii kalana u ogolaaday dalal shisheeye.”
Xildhibaan C/raxmaan Odawaa ayaa Xukuumadda u jeediyay talooyin ku aadan tallaabooyinka ay tahay in arrintan laga qaado waxaana ka mid ahaa:-
1- Waa in loo yeeraa safiirka UAE u fadhiya Soomaaliya lagana waraystaa mawqifkooda ku aaddan midnimada Soomaaliya.
2- Waa in dhammaan heshiisyada DP World ee Soomaaliya la joojiyaa sida kan Berbera iyo Bosaaso (maaddaama aysan oggolaan xukumadda Federaalka ah, barlamaankuna uusan ansixin labada heshiisba).
3. Haddii aysan xukuumaddu qaadin tallaabooyin cad cad oo aan aheyn baaq kaliya, waxaan u qaadanaynaa in ay arrimahan wax ka ogtahay.
https://www.jowhar.com/somali/xildhibaa ... ooga.html5
