Postby LeJusticier » Wed Jul 01, 2020 10:19 am
Heesta an maalo hasheena maandeeq xitaa dadku qlad bay ka fahmeen macneheeda
Aan Maalno Hasheena Maandeeq
============================
1959 kii, Riwaayaddii uu alifay abwaanka weyn ee Saxardiid Maxamuud Cilmi (Jabiye), ee Hal-ku-dheggeedu ahaa, 'Gar Diid Waa Alla Diid' ... waxay ahayd saadaal ku saabsanayd doorashada Baarlamanka ee la qaban doono 17/Feb/1960, iyo xoriyadda la qaadan doono 26/June/1960. Abwaanku waxa uu sii saadaaliyay in ay mataanoobi doonaan Xisbigii Jeegaanta ee USP iyo Xisbigii SNL. Sidoo kale in Xisbiga NUF uu heli doono uun hal kursi oo keliya. Jilayaasha Riwaayaddaasi waxay kala ahaayeen:
1) Abwaan Maxamed Ismaaciil Maxamuud (Barkhad Cas)
2) Abwaan Saxariid Maxamuud Cilmi (Jabiye)
3) Aabihii Fanka C/laahi Qarshe
4) Maxamed Axmed Kuluc
5) Maxamed Yuusuf Cabdi
6) Xasan Cali Gidhin
7) Cabdillaahi Cumar Cunaaye
8) Maxamed Xasan (Baaniyaal)
9) Sahra Iftin
10) Xasan Cabdillaahi (Jeena Cadde).
Heesta tis-qaadday ee ku jirtay Riwaayaddaas waxay ahayd heestii 'Aan Maalo Hasheena Maandeeq'. haddaba waxay Somalidu qalad ka fahmeen, ama ay dhalan rogeen ereyada ahaa: "Maantay Curatayooy Mataanaysay". Waxay u beddaleen: "Maantay Curatayooy Mataano Dhashay". Ujeeddada ereyadaasi may ahayn Somalia iyo Somaliland oo is raacaya. Xaasha! oo arrinkaasi, hiyigaba laguma hayn markaas oo ahayd 1959 kii. Waxa uu Abwaanku saadaaliyay is-raaca USP iyo SNL oo xoriyad doonkii ku mataanoobay.
Riwaayaddan oo haddana laga dhigay Caasimaddii Cadan ee dalka Yaman, ayay Reer cadmeedkii ula baxeen, Naaqatal Xoriyah. Oo ay ka wadaan Hasheena Maandeeq. Heestan waxaa ugu horreyn ku luuqeeyay Maxamad Axmed Kuluc, oo xijaabtay 17/Jan/2015. Allah haw naxariisto:
Ma jiro maanta midab gumaysigiiyoo
Xidigtaa muuqatay, na meeydhaantee (na beddeshay)
Waa maalin hor-loon i soo marine
Aan maalno hasheena maandeeq
Ma goowdoo candhadii golaha marisayee
Aan maalno hasheena maandeeq
Dhaaxaan murugiyo cadaadis u mutaye
Waa maalin Ilahay oo magac lehe
Aan maalno hasheena maandeeq
Ma goowdoo candhadii golaha marisayee
Aan maalno hasheena maan deeq
Dhaaxaan miris iyo haraad u mutaye
Waa maalin duciyo bil moowliide
Aan maalno hasheena maandeeq
Ma goowdo candhadii gollaha marisaye
Aan maalno hasheena maan deeq
War-mooge ha yidhaahdo waa ma-jirtee
Waa maalin muraniyo makeeki hadhee
Aan maalno hasheena maan deeq
Ma gowdoo candhadii gollaha marisaye
Aan maalno hasheena maan deeq
Waa maalin Saxeexu maareeyee
Maanteey curatooy mataanaysee
Aan maalno hasheena maan deeq
Ma goowdoo candhadii gollaha marisayee
Aan maalno hasheena maan deeq
Dhaaxaan murugiyo rasaas u maree
Waa maalin cadoon madowbeeyne
Aan maalno hasheena maan deeq
Ma goowdoo candhadii gollaha marisayee
Aan maalno hasheena maan deeq
Abwaan Maxamed Xaaji Ismaaciil Baasarce (Balaayo Cas) ayaa, ayaa, maalin maalmaha ka mida, u yimid saaxiibkii Abwaan Saxariid Maxamuud Cilmi (Jabiye). Waxaanu ku yidhi isagoo la kaftamaya: “Waaryaahe Saxardiid, anna gumeysigii baan ka ciishoonayay, oo waataan lahaa:
Hooyadey gacalaa afka uun garata
Ubadna ma gardaadsadoo magartee
Guracaa dheeri waa gumaysiga
“Adna waa adigan bidhaamaye, nuuraya ee case, anna waa i kan, oo xididkii uun baa igu sii jiree … Tacadigii iyo murugadii gumaysigaan la xanuunsanayaa. Bal waxaad adigu sidan u noqotay, anna sidan ii galay, hees iigu sheeg; Ileen gumaysigii ayaynu kawada gabyaynee … Immikadan hees iigu sheeg sababta ina kala duwday!”
Markaas ayuu gartay Abwaan Saxardiid Jabiye, in Abwaan Barkhad Cas uu isaga tijaabinayo. Dabadeeto wuxuu ku jawaabay Abwaan Jabiye, gole-ka-fuul u dhacay sidan:
Bilicda hilibka iyo bidhaanta ha arkine
Bukaanku dadka waa nimuu bararshiyo
Nimuu baaxadiisa kala jaree
Balaayoy naftaada ha baqa galin
Halkaa ku bugta ana i belalshoo
Beerkiyo wadnahaysu baaqaayee
Balaayooy naftaada ha baqa galin
Inaad bari dhaw bul adag noqoto
Balan baan kuugu qaaday adoo bogsadoo
Birtiyo calankaa buruud kuu sidee
Balaayooy naftaada ha baqa galin
Kolkaasuu intuu soo kacay Abwaan Barkhad Cas, ayuu gacan qaaday Abwaan Saxardiid (Jabiye), isaga oo ku dhawaaqaya: “Wakaas oo, Wallaahi, in aanan dhimanayn ilaa aan calanka arko.”
Allah haw naxariistee, wuxuu dhintay Abwaan Barkhad Cas 1963kii, isaga oo Calanka arkay oo wax-ka-saaray calankii.