Beesha Absame oo dagaalka Muqdisho ku eedeysay Dowlada KMG.
Muqdisho, Axad, April 22, 2007 Simba Radio
Beesha Absame ayaa dagaaladda ka socda magaalada Muqdisho maanta ku eedeysay inay mas'uul ka tahay Dowladda KMG ah ee Somalia .
Kulan xubno ka tirsan beeshaasi ay ku yeesheen magaalada Muqdisho ayay kasoo saareen baaq dheer oo qodobada laga soo saaray ay kamid aheyd in ciidamada Ethiopia ay ka baxaan dalka Somalia, iyadoo joogitaanka ciidamada Ethiopia ay beesha ku tilmaamtay mid aan sharci aheyn.
Beesha waxey ugu baaqday ciidamada Ethiopia inay xabada joojiyaan, isla markaana ay daayaan sida ay yiraahdeen madaafiicda shacabka Muqdisho ay ku garaacayaan.
Sidoo kale, waxey beesha ka codsatay shacabka Soomaaliyeed gaar ahaan kuwa dibadaha ku dhaqan inay u gar gaaraan dadka dhibaatooyinka ay ku heystaan gudaha magaalada Muqdisho iyo dadka ka barakacay.
Si kastaba, baaqaan kasoo yeeray beesha Absame ayaa kusoo beegmay xili dagaalo culus oo madaafiic xoogan la isku adeegsanayo maalintii afaraad ay ka socdaan gudaha magaalada Muqdisho kaasoo dhex maraya ciidamada Ethiopia iyo kooxaha kasoo horjeeda joogitaankooda magaalada Muqdisho.
