Nabadoon Abshir Shareeco:Xarigga Odayaasha Waxaa Uu Dabasocdaa Dagaaladii Ka Dhacay Magaalada Kismaayo
Aug 01,2007
by B/Xaawo-GEDO-NN
Nabadoon Abshir Nuur Shareeco oo ka mid ah nabadoonada gobalka GEDO ayaa war saxaafadeed uu ka soo saaray gobalka GEDO ku eedeeyey in dowladda federaalka ahi ay ka dambeysay xarriga loo geystay siyaasiin iyo waxgrad ka soo jeeda gobalka GEDO oo lagu xirxiray magaalada Nairobi ee wadanka Kenya kadib markii ay codsi qoraal ah u soo gudbiyeen kooxo ka tirsan maleeshiyada nabadsugidda dowladda federaalka ee ku sugan magaalada Nairobi sida ay xaqiijiyeen ciidanka dembi baarista ee wadanka Kenya.
Chief Shareeco ayaa waxaa ku sheegay warsaxaafadeedkiisa in xarriga loo geystay siyaasiinta, waxgaradka iyo ganacsatada uu dabo joogo dagaaladii ku dhex maray ciidamo ka tirsan kuwa dowladda federaalka Soomaliya oo fadhigoodu yahay magaalada Kismaayo oo looga adkaayay mid ka mid ah ciidamadaasi. Nabadoonka ayaa sidoo kale sheegay "in hadii dagaaladii ka dhacay magaalada Kismaayo loo bedelo in dadka lagu ugaarsado wadamada deriska ah, in waxii ka yimaada ay dhabarka ama masuuliyadda ay qaadi doonto dowladda federaalka iyo masuuliyiinteeda ugu sareeysa oo ku yiri waa inay ka waantoobaan wax alle waxii keeni kara inuu lagu sii kale fogeeyo beelaha Soomaliyeed, ayna joojiyaan falalka afduubka ah oo ay ku maleegayaan wadamada deriska ah".
Nabadoonka ayaa sidoo kale warsaxaafadeedkiisa ku sheegay "inaysan marnaba ogaalaalin in iyadoo la leeyahay shir beeleedyo ayaa ka socda caasimadii Muqdisho oo beelaha lagu heshiisiinayo, in hadana dad ka tirsan hal beel lagu ugaarsado wadamo kale oo cunaqabaytan lagu soo rogo ganacsigoodii, xoriyadoodiina laga qaado, si buu yiri loo huriyo colaadaha ka jira gobollada Jubbooyinka oo u baahan in si wadojir ah wax looga qabto".
Chief Abshir Nuur Shareeco ayaa sidoo kale sheegay in si deg deg ah loo sii daayo dhammaan waxgaradkii iyo siyaasiin xarigga loo geystay, dowladda ay jawaab ka soo saarto sababta ay waxgaradka hal beel ka soo jeeda ay si gooni ah ugu ugaarsanayso wadamada deriska la ah Soomaliya.
Nabdoonka ayaa ugu dambeyntii ugu baaqay wadanka Kenya inay si shuruud la'aan loo siidaayo waxgaradka iyo siyaasiinta ka soo jeeda beesha SADE oo uu yiri waxaa naga dhaxeeya wadanka Kenya deris wanaag iyo iskaashi dhinac walba ah, uguna baaqay inaysan la safan dhinac ka mid ah beelaha Soomaliyeed.
GEDO-NN-B/Xaawo
