Buundada degmada Baardheere ee gobolka Gedo ayaa lagu bilaabay dayactir si kumeel gaar ah u socon doona, kaasoo ay iska kaashanayaan qeyba kala duwan ee bulshada degmadaasi oo ku fekirtay in ay iskood u dhistaan buundada oo halbowle u ah isu socodka dadka iyo gaadiidka.
Guddi ka koooban ilaa 9 xubnood oo ay iska soo dhex magacaabeen ganacsatada, culumaa-udiinka iyo waxgaradka Baardheere ayaa manta oo Sabti ah dayactirkii ugu horeeyey ku sameynaya buundada burburka uu ragaadiyey ee Baardheere ku taal, taasoo tan iyo bishii October ee sanadkii hore burbursaneyd, waxaana shaqaalaha dhismaha saaka ay bilaabeen in qeybihii ay buundada ka burburtay dhigaan Alwaax iyo Biro la tilmaamaya in ay dhaxalgal u tahay bridge-ka.
Guddoomiyaha guddigan howsha dayactirka ah wada C/fitaax Maxamed Cali oo wariyayaasha kula hadlay gudaha Baardheere ayaa hoosta ka xariiqay in qorshahan uu yahay mid si kumeel gaar ah u socon doona, islamarkaana uu xigi doona kuwa ballaaran oo lagu hirgelinaya buundada oo idil, lana filaya in dhawaan la qabta waa sida uu carabka ku dhuftaye mas'uulkaasi oo intaasi sii raacsaday baaq uu u jeediyey Soomaalida qurba jooga ah oo uu ugu baaqay in ay gacan ka geysteen howshan wax ku oolka ah.
Dayactir lagu sameeyaa buundada loo maara waayey ee Baardheere ayaa waxaa meesha ka baxay xayiraadii waayadan danbe ay galisay adeegsiga gaadiidka xamuulka ee buundada, waxaana tani ay ka danbeysay kadib markii maalmahan ay kulama xiriir ah yeelanayeen maamulka, odayaasha deegaanka, ganacsatada iyo hay'adaha samafalka oo looga hadlayey sidii buundada dib u dhis loogu sameyn lahaa.
Maxamed Xaashi Tawakal, Gedoweb Kismaayo.