Afhayeenka beesha Sade ee gobolka Jubbada hoose Xasan Maxamed Cali (Dheere) oo maanta shir jaraa'id ku qabtay hotel Tawakal ee magaalada Kismaayo ayaa ku dhawaaqay in uu iska casilay xubintii uu ka ahaa Golaha siyaasadda ee beesha Sade kadib markii uu sida uu sheegay la shaqeyn waayey golahaasi oo kala daatay sida cad.
''Laga bilaabo maanta waxaan iska casilay xubintii aan ka ahaa golaha siyaasadda ee beesha Sade sababtuna waxay tahay anigoo la shaqeyn waayey, islamarkaana fahmi waayey golahaasi'', ayuu si kooban u yiri Xasan Maxamed Cali (Dheere) oo ka gaabsaday in uu faahfaahin badan ka bixiyo is casilaadiisa oo mar la weydiyey in uu gudbiyey golahii uu ka tirsanaa iyo midka dhaqanka sheegay in uu keligiis go'aankan gaaray, cidina uusan la socodsiin.
Afhayeenka beesha Sade Xasan Dheere ayaa xusay in uu dib ka soo sheegi doono haddii urur ama koox kale oo siyaasadeed uu ku biirayo, hadalkaasoo laga dhandhansaday in Mr Xasan Dheere uu u xuubsiitay in uu koox kale aado, inkastoo isaga uu diiday in uu fasiraad ka bixiyo cidda ay tahay kooxdaasi, wuxuuna intaasi ku daray in uu sii heyn doono afhayeenimada beesha Sade, walow aanana la ogeyn sida suurtagal ay u noqan karto in qof aan kamid ah aheyn Golaha siyaasadda uu afhayeen sii ahaado.
Xasan Dheere oo ah nin caan ka ah gobolada Jubbooyinka ayaa muddo ku dhaw sanad xubin firfircoon ka ahaa Golaha siyaasadda ee Kismaayo ka dhisan oo uu hoggaanka u hayo Yaasiin Nuur Gaas (Raadeer). Istaqaaladiisa ayaa ku soo beegantay toddobaad uun kadib markii mas'uuliyiin sar sare oo ka shaqeynayey dekedda caalamiga ah ee Kismaayo ay iyagana shaaciyeen in ay ka tageen xilkii ay marsadda ka hayeen, dhammaan arrimahan ayaa loo arkaa khilaaf soo kala dhexgalay xubnaha Golaha siyaasadda beesha Sade.
Maxamed Xaashi Tawakal, Gedoweb Kismaayo.
http://www.gedoweb.com/index/modules.ph ... le&sid=428
