Hoggaanka dhaqanka beesha Sade ee gobolka J/hoose ayaa dhaliilay oo caro ka muujiyey war saxaafeed shalay ay magaalada Kismaayo ee xarunta gobolkaas ka soo saareen guddi la sheegay in uu yahay guddiga dhaqanka iyo siyaasadda beesha Kablalax, kaasoo qaar kamid ah qodabadii ku qornaa qaab sarbeeban loogu weeraray maamulkii beesha Sade ee magaalada Kismaayo ka talin jiray.
Kulan ay maanta magaalad Kismaayo ku yeesheen odayaasha dhaqanka beesha Sade ee J/hoose ayey ku sheegeen kulankooda in ay dhaliilsan yihiin qaar kamid ah qodabada lagu xusay war saxaafeed lix qodab ka koobnaa oo shalay laga baahiyey saxaafadda gudaha dalka, kaasoo ay soo saareen guddiga dhaqanka beesha Kablalax, odayaasha Sade ayaa sheegay in qodaba ay kamid yihiin 10 sano dhibaatoyin ay ka jireen magaalada Kismaayo oo iminka soo afjarmay ay tahay arrin ay la yaabeen sababaha 18 sano 10 sano oo Kismaayo xakunkeed ay beesha Sade heysay looga takooray.
Kulanka kadib ayaa wariyeyaasha waxaa la hadlay sida ay wararku nagu soo gaarayan Nabadoon Cabdi Warsame Gurux oo xubin ka ahaa golihii beesha Sade ee talada lagala wareegay, Nabadoonka ayaa sheegay in carab dalab uu ku jiray ay tahay in 10 sano la yiraahdo dhibaato ayaa lagu hayey bulshada Jubbooyinka. ''Beesha Kablalax waxaa warqadooda ku qorneyd dhibaatooyinkii dadka deegaanka lagu hayey 10 sano waa ay soo afjarmeen, arrintaas waa arrin aan loo baahneyn in 18 sano ee burburka 10 sano laga faquuqo waa arrin aanu ka xunahay'',ayuu yiri Nabadoon Gurux.
Oday dhaqameedkaa ayaa sidoo kale ka hadlay taageero war saxaafadeedka ka soo baxay beesha Kablalax loogu muujiyey shir ka soconayo magaalad Bu'aalle oo Nabadoon Cabdi Warsame Gurux uu ku tilmaamay ayidaada shirkaasi la siiyey mid aan laga fiirsan, isagoo shirkaas ku sheegay mid beesha Sade looga soo horjeeda oo cadawtinimo sida uu odaygan hadalka u dhigay loogu muujinayo.
C/wali Xasan Geesey
Gedoweb Online
Liverpool, UK.
http://www.gedoweb.com/index/modules.ph ... le&sid=771
