Ciidamo ka tirsan urur diimeedka Ahlu suna waljamaaca oo ku biiray maleeshiyada Bare Hiiraale ee ku sugan degmada Doolow
Ilaa iyo 300 oo nin oo ka tirsanaa ciidamada Ahlu suna wal-jameeca ayaa la sheegay iney ku biireen ciidamo taabacsan Xildhibaan Barre Aadan Shire (Hiiraale) oo ku sugnaa degmada Doolow ee gobolka Gedo sida wararku ay sheegayaan.
Ciidamadaasi ayaa beryihii u dambeeyay ka gudbayay inta u dhaxeysa degmooyinka B/Xaawo iyo Garbahaarey, halkaasi oo ay kaga sii talaabayeen degmada Doolow.
Madaxa ururka Al-shabaab ee Gedo Sheekh Ismaaciil Aadan Xaaji Cabdi ayaa isagu ka hadlay ciidamada Ahlu Suna wal jameeca oo la sheegay iney ku biireen kuwa xildhibaan Barre Hiiraale, wuxuuna tilmaamay in ciidamadaasi aysan aheyn kuwa wadaadada Ahlu Suna, hase ahaayee uu yiri ay yihiin ciidamo kale oo ku biiray wax uu ugu yeeray ciidamada Gaalada.
Sheekh Ismaaciil Aadan Xaaji ayaa intaa ku daray in wadaadada Ahlu Suna xiligan gobolka Gedo iney ayaga yihiin, cidii Ahlu suna ah dadku ay garan karaan, wuxuuna intaa raaciyay “Waa ciidamo meelo kale ay ka keeneen kuwii Gaalda ahaa ee awalba joogay Doolow, waana iska celin doonaa haddii ay nasoo weeraraan” ayuu ku goodiyay Madaxa ururka Al-shabaab ee Gedo Sheekh Ismaaciil Aadan Xaaji Cabdi.
Ma jirto hadal ka soo baxay mas'uuliyiinta ururka Ahlu Suna wal jameeca oo ku aadan ciidamdan la sheegay iney ku biireen kuwo horay u joogay degmada Doolow ee taageersanaa Xildhibaan Barre Aadan Shire.
http://www.xog-waran.com/xog-waran12April2009Dolow.html