Print here| By: allgedo.com: Monday, June 20, 2011 // 1 Jawaab
Ceelcade – Gedo (Somalia) – Waxaa shaley gelinkii dambe deegaanka Ceelcade oo ka tirsan Gobolka Gedo lagu soo gabagabeeyey Shir mudo 5 maalin ah, halkaasi ugu soconayey Qaar ka mid ah Odoyaasha, Culamaudiinka iyo Waxgarad kale oo ka soo jeeda Beesha Reer Garaad, iyadoo kulankaasi oo ay ka qeyb galeen dad ka badan ilaa 100 ruux ayey Beeshu kaga hadley arimo dhowr oo Quseeya danaha guud ee Beeshaasi oo ka mid ah Beelaha SADE iyo Xaalada guud ee Gobolka uu ku sugan yahay.
Shirkani oo ay soo Qabanqaabiyeen Qaar ka mid ah Odoyaasha deegaanka Ceelcade ayaa ujeedadiisu waxay ahayd labo arimood oo kala ah, marka kowaad in la doorto Nabadoon hogaamiya mid ka mid ah Jufooyinka Beesha Reer Garaad, iyadoo Xilka nabadoonimada Jufadaasi oo uu horey u hayey Nabadoon Sheekh Cabdulaahi Cabdi Ciise oo mudo ka badan 17 sano hayey ayaa Xilkaasi Nabadooninimo waxaa uu ku wareejiyey Macalin Salaad Cabdille Maxamed oo ku yimid sida la sheegay Qaab xulasho ah.
Sidoo kale Shirkaasi Gunaanadkiisa oo ay goob joog ka ahaayeen Qaar ka mid ah Odoyaasha Beelaha kale ee Reer SADE kuna sugan deegaanka Ceelcade ayey beesha Reer Garaad waxaa ay ka soo saareen Bayaan ka kooban ilaa 3 Qodob oo ay si gaar ah uga hadlayeen Xaaladaha dalka uu marayo,mida Gobolka iyo weliba mowqifka guud ee Beesha, waxaana Bayaanku u qornaa Sidatan:
1- Beeshu waxay ictiraaftey Nimcada iyo Islaanimada uu alle siiyey
2- Beesha waxay go’aan ku gaartey in la ilaaliyo Midnimada reer Garaad,wax kasta oo khilaaf ahna lagu xaliyo sida ay qabto shareecada Islaamka.
3- Beesha waxa balan qaadeysaa In ay garab istaago Kitaabka alle.
Dhinaca kale, mas’uuliyiintii iyo Odoyaashii ka qeyb galey Gunaanadka Shirka ayaa waxaa ka mid ahaa Gudoomiyaha Deegaanka Ceelcade Sheekh Aden Shukri Ciye oo ku amaanay beesha xulashada Nabadoonka iyo Bayaanka ay soo saareen, waxuuna gudoomiyahu uu tilmaamay Maamulka Islaamiga ee Gobolka Gedo in uu soo dhaweynayo natiijooyikii ka soo baxay Shirkaasi.
Sidoo kale Xubnahii Odoyaasha ahaa ee ka goob jooga ka ahaa Shirkaasi ayaa waxaa ka mid ahaa Ugaas Maxamed Weli Sheekh Axmed, Nabadoon Xasan Xirsi Ciise, Nabadoon Maxamed Axmed Faarax (indhayare), Nabadoon Sheekh Cabdulaahi Cabdi Ciise, Nabadoon: Sheekh Maxamuud Macalin Yuusf, Nabadoon Cali Macalin Aden (Cali xiish), Maxamed Cali Ducaale iyo Xubno kale.
Waana markii ugu horeysay oo shir beeleed noocani oo kale ah uu dhaco deegaanka ceelcade, islamarkaana ay ka soo baxaan Go’aano quseeya arimaha murugsan ee ka taagan dalka Soomaaliya iyo weliba Xaalada Gobolka.
——-
Cumar Jaajaa, Ceelcade-Gedo.
http://www.allgedo.com/2011/06/20/ugaas ... agabeeyay/
Midnimada Reer Garaad Waa Midnimada Beelweynta Sade
