Waxay beeshu casuumaad u fidisay ganacsade ismaaciil gadoon iyo cabdifataax oo safar shaqo ku yimid UK. Soo dhawayn kadib waxay beeshu ka dhagaysatay martida warbixin ku saabsan xaalada guud ee soomaaliya iyo gaar ahaan xaalada deegaanada beesha Sade
Warbixinadaas iyo is xogwaraysigaas kadib waxaa beesha u soo baxday in xaaladii soomaaliya iyo tii Deegaanadii Beesha Mareexaan oo Markii horoba aad u qalafsanayd ay hada ka sii darayso oo maalinba maalinta kadanbaysa wadankii galayo marxalad cusub oo wadata xasilooni daro siyaasadeed, nabad la`aan iyo daryeel la`aan xaga arimaha bulshada.
Si arimahaas kor ku xusan xal looga gaaro, waxay beesha Cali Maxamed ee UK talo ku soo jeedinaysaa Qodobada Hoos Ku qoran.
1- In wadatashiga la xoojiyo si beesha Cali Maxamed inteeda dibada iyo gudaha ku nool ay u qaataan mawqif midaysan oo ku aadan xal u helida arimahaas kor kuxusan.
2- Maadaama ay midnimada Beesha Mareexaan ay furo u tahay xal u helida dhibaatooyinka kataagan Deegaanada Mareexaan. Waxay beeshu tala ku soo jeedinaysaa si ay u sahlanaato is fahamka iyo wax wada qabsiga beesha Mareexaan in Jifo walba ay is aruuriyaan una midoobaan ka shaqaynta danta guud. Hadii jifo walba dhinac ka soo jeesato waxaa meesha kabaxaya danaha shaqsiga, kooxa kooxaysiga iyo in afartii meel isugutimaadaba sheegato inay mareexaan wakiil kayihiin.
3- Dawlada kumeelgaarka masuuliyiinteeda waxaan u sheegaynaa in xabad iyo qori caaradii kaliya aan waxba lagu xalinkarin taas badalkeed waxaan ku baaqaynaa inaad kashaqaysaan dibuheshiisiinta si nabadgalyada iyo nolasha dadka aysan qalqal ugalin. Labo, in ciidankiina bartaan anshax wanaaga si ay mardanbe u dhicin dilalka micna darada ah iyo boobka hantida shacabka. Sadex, anagoo si xun u canbaaraynayna falalkii dilka iyo xariga ahaa ee loo gaystay dad aan waxba galabsan, waxaan TFG u soo jeedinaynaa inay lashaqeeyaan odayaasha iyo masuuliyinnta beesha ee joogta deegaankii oo ku hawlan siidaynta inta xiran iyo horkeenida cadaalada kuwii dilka gaystay.
4- AL-SHABAAB waxaan kula talinaynaa inaad ogolaataan in dhibaatada ka jirta soomaaliya lagu xaliyo wadahal nabadeed qaybtiinana ka qaadataan maadaama ay marnaba suurtagal ahayn in dhibaatada soomaaliya lagusoo afjaro xoog iyo qori caaradii. Labo, AL-SHABAAB waxaan ugubaaqaynaa Inaad dib ufurtaan ganacsigii gobolka ee hakadka galay si qiimaha maciishadu hoos ugu dhacdo islamarkaana culayska shacabku dareemayaan ee xaga nolashana uu u yaraado.
Ugu danbayntii waxaan Illaahay uga baryaynaa guud ahaan soomaali, gaar ahaana mareexaan in Illaahay ka saaro dhibaatada, isfahamna dhexdhigo, garansiiyana dantooda guud. Aamiin.
