Ciidamo Itoobiyaan ah oo ku sugan Gobolka Awdal iyo Xukuumada Silaanyo oo ka Aamusan
Heestii Hambalyo iyo Fanaankii Weynaa ee Caanka ahaa Sir Maxamud Cumar
September 4, 2010
Boorama, (sli) – Wararka ka imanaya dhinaca soohdinta gobolka Awdal la leeyahay dalka Itoobiya ayaa la sheegeyaa in ciidamada dalkaasi lagu soo dhaweeyey xadka, halkaasina ay ka wadaan dhaqdhaqaaqyo la xidhiidha dhinaca amniga.
Sida uu ku soo waramay weriyaha Saxafi ee gobolada galbeedka Somaliland, Maxamed Cumar Sheekh, wararkan oo ilaa labadii maalmood ee u dambeeyeyba soo noqnoqonayay, ayaa aakhirataankii la sheegeyaa in goobo ka mid ah degaanada soohdinta labada dal ay ku sugan yihiin cutubyo ka tirsan ciidamada Itoobiya, laga soo bilaabo magaalada Wajaale ilaa galbeedka gobolka Awdal.
Sida wararka socotada ka imanaysa degaanada xadku sheegeyaan, waxa dhawrki maalmood ee ugu dambeeyeyba halkaasi lagu soo daadgureynayey ciidamadaasi, iyadoo dhinaca kalena aanay jirin wax war ah oo ka soo baxaya labada dal kuna saabsan dhaqdhaqaaqa ciidamadaasi.
Warar aan la xaqiijin ayaa sidoo kale sheegeya in dawladda Itoobiya beryahan feejignaan dhinaca amniga ah saartay soohdinta Somaliland ay la leedahay, halkaas oo sida la sheegeyo looga baqayo inay ka soo galaan kooxaha dagaalka kula jira Somalia una soo tallaabaan dhinaca Itoobiya.
Isku socodka gaadiidka Boorama iyo Aw Bare oo awal si fudud iskugu gudbi jiray xitaa haddii aanay lahayn lambarada labada dal, ayaa iyadana la adkeeyey isla markaana aanay Itoobiya u gudbi karin gaadiid aan lahayn lambarka Itoobiya, iyadoo dhinaca kalena baadhista dadka socotada ah ee u sii gudbaya gudaha Itoobiyana la adkeeyey.
Printer-friendly version
Submitted by news on September 4, 2010 - 5:30pm.
Source: http://somalilandinfo.com/node/10267
