08 July 2011
Addis Ababa (Kilil5) ---War aanu ka helnay qaar kamida shaqaalaha hay'adda Qaramada Midoobay ayaa sheegaya in masuulkii u sareeyay laanta arimaha nabadgalyada ee UN ta ee marka lasoo gaabiyo looyaqaan UNDSS ee Dawlad Deegaanka Soomaalida oo magaciisa layidhaahdo Cabdi Bakool xabsiga ladhigay. Masuulkan ayaa sida ay wararku tibaaxayaan mudo 2 cisho kahor ah ay ciidamo iskudhaf ah oo isugu jiray Faderaal iyo Liyuu Boolis ay saqbadii dhexe kalabaxeen huteelkii uu deganaa oo ku yaala xaafada Boole ee magaalada Addis Ababa. Ciidankan ayaa lasheegayaa in ay jidh dil u gaysteen masuulka, isla markaana ay kaxaysteen.
Xadhiga masuulkan ayaa sabab looga dhigayaa inuu door kaqaatay siidayntii iyo badbaadintii labadii nin ee katirsanaa shaqaalaha hay'adda cuntada aduunka ee WFP, kuwaas oo ay qafaasheen jabhada ONLF, mudo kadibna siidaayeen iyagoo geeyay magaalada Hargaysa ee Jamuuriyada Somaliland, iyagoo kuwareejiyay laamaha hay'addan ee wadankaas. Labadan nin ayaa kadib markii Hagaysa lageeyay looduliyay magaalada Nairobi ee dalka Kenya, kadibna lagu soo celiyay magaaladan Addis Ababa ee dalkan Itoobiya.
Labadan nin ayaa ilaa hadda lasheegayaa in ay gacanta kuhayaan laamaha amniga ee Qaramada Midoobay, iyaga oo looga baqaayo waxyeelo inay soogaadho. Waxaa ilaa hada la iswaydiinayaa sababta amniga labadan masuul looga cabsiqabo ee loogu diidanyahay inay deegaanka yimaadaan oo ay kusoo laabtaan reerohoodii. Jabhada ONLF, ayaa hore ugu andacootay in jid gooyadii lagu dilay mid kamid ah shaqaalaha hay'adda WFP ee lagu qafaashay labadan nin oo kadhacday degmada cusub ee Galaalshe ee Gobolka Fiiq ay kadambeeyeen ciidamada Liyuu Boolisku. Waxaa kale oo ay ONLF maalmo kadib ayay warbaahinta caalamka ku faafiyeen in labadii nin ay dagaal kusoofurteen iyaga oo kasoofurtay ciidamada Liyuuga iyo inay gacanta u galindoonaan Qaramada Midoobay.
Hadaba waxaa iswaydiin leh sababta Qaramada Midoobay ay ugu baqayso nolosha iyo amaanka labadan nin? Iyo sababta looga ilaalinaayo inay deegaanka yimaadaan, ilaa hadana ay ugu jiraan gacanta hay'adda. Waxaa kale oo iswaydiin leh sababta looqafaashay masuulkii kashaqeeyay soodaynta labadan nin. Miyaanse loo arkikarin inay run tahay andocooyinkii jabhadu ay ku faafiyeen saxaafadaha caalamka, mar hadii aysan xukuumaddu raali ka ahayn soodaynta labadan nin, lana xidhay mas'uulkii hawlahan u qaabilsanaa Qaramada Midoobay.
Dhanka kale shaqaalaha hay'adaha UN-ta ee nasoo gaadhsiiyay warkan, ayaa saadaalinaya in xadhiga mas'uulkan iyo damaanad la’aanta labadan mas,uul ay sababi karto in hay'adaha kubahoobay dallada Qaramada Midoobay ay joojiyaan dhamaan shaqooyinka ay kawadaan dalka, gaar ahaan deegaanka Soomaalida, xili ay abaaro darani kajiraan guud ahaan Geeska Afrika.
Xuseen Caraale
Addis Ababa, Kilil5
