Waftigii ay Hogaaminayeen Garaadka Guud ee Beelaha SSC Garaad Jaamac Garaad Cali iyo Hogaamiyaha SSC Saleebaan Ciise Axmed {Xaglatoosiye}, ayaa waxaa habeenimadii xalay Afur iyo casho u sameeyey Odayaasha dhaqanka Beelaha Hawiye iyo Xildhibaano ka soojeeda isla beesha Hawiye. Odaaysha ayaa waxaa ka mid ahaa Gudoomiyaha odayaasha dhaqanka Beelaha Hawiye Maxamed Xassan Xaad iyo Afhayeen beelahaas Axmed Diiriye Cali. Waxaa kaloo ku weheliyey xubno kale oo ka mid ah Duubabka iyo Madax dhaqameedka beeshaasi Hawiye.
Sidoo kale waxaa kulnaka qayb ka ahaa Xildhibaanada beesha Hawiye ugu jira Barlamaanka Soomaaliya, halka kuwa SSC qaarkoodna meesha marayeen, waxaana bacda Afurkii laga wada hadlay arimaha xidhiidhka ee u dhexeeya labada Beelood ee Soomaaliyeed, waxaana la isla qaatay in Midnimada Soomaaliya ay tahay lama taabtaan isla markaan maamulka SSC lagu taageero looguna mahad celiyey sida ay markastaba u difaacayaan calanka Soomaaliyeed iyo midnimada dhulka jamhuuriyada. Waxaa ay wufuudu sidoo kale dhagaysteen la islana rog rogey halka ugu haboon ee lagu qaban karo shirka wadatashiga qaybaha Soomaaliyeed ee ka dhici doona gudaha dalka.
Labada dhinac ayaa tallooyin badan ka dib waxay isku Afgarteen in shirka laga dhigo magaalo madaxda dalka ee Muqdisho taasoo Amaan ahaan iyo maaliyad ahaanba xanbaari karta, isla markaana ay tahay caasimadii Soomaaliyeed. Madaxda SSC ayaa sheegay in ay soo jeedintooda ay ka timid markeey arkeen rabitaanka shacabka SSC ee midnimada jecel, kuwaasoo aad u danaynaya in caasimadu noqoto goobta gogasha la dhigi karo.
Ugu danbeytii ayaa qalinka lagu duugey la iskuna raacay in Muqdisho ay ku haboon tahay in laga dhigo shirweynaha, maadaba amaankeeda aad loo sugay isla markaana madaxdii caalamku gaala baxayaan. Sidoo kale xildhibaanada iyo madaxda SSC ayaa ku balamay ka wada shaqaynta amaanka dalka, Midnimada iyo taageerida dawladda dhexe iyo in maamulka SSC lagu gacan siiyo Soomaalinimada ay hadh iyo habeen u Loolamayaan.
Source: Horufadhi News Desk.
