INNAA LILLAAHI WA INNAA ILAAYHI RAAJICUUN
WAXAA GEERIYOODAY GARAADADA SOOMAALIYEED EE AAD CAANKA U AHAA GARAAD CABDIQANI GARAAD JAAMAC OO KASOO JEEDA BEESHA DHULBAHANTE.
TAARIIKH NOLOLEED GARAADKA ALLAHA U NAXARIISTEE:
Taariikh Nololeedkii Allahaw Naxariistee Garaad C/qani Garaad Jaamac
Allahaw Naxariistee Garaad Cabdiqani Garaad Jaamac waxaa uu ku dhashay Magaalada Laascaanood sanadkii 1935,halkaasi oo uu ku bartey Qur’aanka kariimka ah,waxaanu sidoo kale dugsiga hoose ka galay magaalada Laascaanood 1945kii ,dugsiga dhexe waxa uu ka galay Magaalada Shiikh sanadkii 1949.
Sanadkii 1953 ayuu ku biiray Macahadka Farsamada gacanta ee Magaalada Boorame,waxaanu allahaw naxariistee Garaad C/qani waxbarashadiisa Jaamacadeed ku soo qaatey Dalka Ingiriiska dabayaaqadii sanadkii 1959, wuxuuna ka soo qalin jabiyey kuliyada siyaasada.
Allahaw naxariistee shaqadii ugu horaysey waxaa uu Garaadku ka qabtey Bangiga waxaanu guddoomiye ku xigeen ka noqday laantii Berbera xiligii gumaystuhu haystey dalka,isla waayahaas waxuu garaadka loo magacaabay Guddoomiyaha Degmada Ceerigaabo,mar kale ayaa garaadka loo magacaabay Guddoomiyaha Degmada Berbera.
Allahaw naxariistee Garaad C/qani waxuu gobonnimada ka dib mudo dheer madax ka ahaa xafiiska danaha Soomaalida,kaasi oo uu garaadku wax weyn ka jibo keenay.
Allahaw Naxariistee Garaadku wuxuu shaqada ka fadhiistey sanadkii
1981,Inta badana waxa uu garaadku nolashiisa ku qaatay Magaalo madaxdii Soomaaliya ee Muqdisho,waxaana garaadnimada loo caleema saaray Garaadka sanadkii 15-11-1985, iyadoo lagu caleema saaray duuxada Geeda Qarsay ee magaalada Laascaanood,kadib markii uu geeriyooday Garaadkii hore Garaad Cali Garaad Jaamac.
Garaad C/qani waxa uu ahaa Garaadkii 18 Tobnaad ee dhaxla Boqortooyada Beelaha dega Gobollada Sool Sanaag Iyo Cayn,garaadku waxaa uu ka mid ahaa dadka faro ku tiriska ahaa ee dhaliilay hanaankii Dawladii Kacankii Max’ed Siyaad Barre,waxaanu ka mid ahaa 114kii nin ee saxiixay Bayaankii caanka ahaa ee Maanofaysto ee 15 May sanadkii 1990 ka soo baxay magaalada Muqdisho.
Dawladii Raysulwasaare Cumar Carte Qaalib ee aan hirgalin ee dhamaadkii sagaashanaadkii waxaa garaadka loo magacabay 17 Janaayo Sanadkii 1990 Wasiirka Arimaha Dibada.
Allahaw Naxariistee Garaadku waxii ka danbeeyey burburkii Dawladii Soomaaliya ka dib waxaa uu ka qayb galay Shirar badan oo Soomaalida lagu nabadaynayey,waxaanu ahaa Shirkuu ugu horeeyey kii ka dhacay Tuulada Oog 5 Febaraayo ee sanadkii 1991,kaasi oo ahaa shir xabad joojineed ee ay wada gaadheen Beelaha Waqooyiga Soomaaliya.
Sidoo kale waxaa uu ka qayb galay Allahaw Naxariistee Garaad C/qani Shirkii isna ka dhacay degmada Berbera,sidoo kale waxaa uu Garaadku ka qayb galay shirkii ka dhacay Magaalada Burco sanadkii 1May 1991-kii,waxaa kale uu Garaad C/qani ka qayb galay labadii Shir ee golol xaadhka iyo Dhisidii Puntland sanadkii 1998,sidoo kale waxaa uu Garaadku ka qayb galay Shirkii lagu soo dhisay Dawladii Carta ee uu Madaxweynaha ka noqday C/qaasim Salaad Xasan sanadkii 2000.
Waxuu Garaadku maalinimadii Shalay Ahayd ku geeriyooday Magaalada Jabuuti,waxaanu Allahaw Naxariistee Garaadku Ifka kaga tagay Sadex wiil iyo Sagaal Caruur ah oo ay sii dhaleen,waxaana Maanta Garaadka Lagu Aaasay Xabaalaha Magaalada Laascaanood.
ILaahay hawnaxariisto Garaad C/qani Garaad Jaamac
http://www.sscayn.com/fullpage.php?sscid=2201
