badan leh ayaa maalmahan noqday wax u sahlan sidii shaati la siibey, ama sigaar la shiday, ama telefoon la qabtay. Arrintu waxay hadda gaartay in nin iyo xaaskii ay ku murmaan wax u sahlan sida filinkii ay fiirsan lahaayeen dabadeedna ay si degdeg ah u burburiyaan gurigii saacad ka hor hagaagsanaa oo iftiimayey. 
Qaar ka mid ah waxyaabaha furriinka ilaa xadkaa fududeeyey ayaa waxay culimada aqoonta duruqsan u leh arrimaha bulshada ee kuna takhasusay qoyska Soomaaaliyeed ku tilmaamayaan in ay tahay ceebtii la xiriirtay furriinka aad u yaraatay. Xaqiiqada ah, ayay yiraahdeen, in dabeecadda qofka Soomaaliga ah oo xumaatay
dagaallada sokeeye iyo dhibaatooyinkii ay wateen awgood iyaduna wax bay arrinta ku soo kordhisay. Sabab kale oo arrintan lala xiriiriyo waxa weeye ku tiirsanaanta ay haweenku ku tiirsanaayeen nimankooda oo intii hore ka yaraatay. Sidii uu dagaalka u dhacay waxaa soo baxay haween badan oo Soomaaliyeed oo ganacsada ama si kale xoolo kuwooda ah u haysta oo markaa aan u hoggaansanayn sidii kuwii iyaga ka horreeyey.
Madaxbannaanidaa ayaa keentay in aysan haweenku aqbalin qashin badan oo ay aqbali jireen markii hore ee ay dhaqaale ahaan ugu tiirsanaayeen saygooda.
Guurarka la agaasimo oo ay waaliddiinta labada qof isu xulaan carruurtooda iyaduna qayb bay ka tahay xaddiga korriinka oo xawliga ku soconaya. Gabdho iyo wiilal badan ayaa qoorta la soo qabtaa oo waxaa guri loogu geeyaa qof kale oo aysan weligood is arag. Taasi waxay keentaa in dhawr beri ka dib uu qof waliba geeso u gaar ah la soo baxo oo ay labada qof dab iyo dhagax noqdaan oo meeshii lagu kala tago.
