Xisbiga Mucaaridka Ah Ee UCID Oo Xaflad Ballaadhan Oo Soo Dhawayn Ah U Sameeyey Taageerayaal Badan Oo Ku Soo Biiray
Xisbiga UCID oo Xaflad Balaadhan U Sameeyay Taageereyaal Ka Soo Baxay Xisbiyada UDUB iyo KULMIYE
“Dawladii Hoose iyo Tii Sareba way inaga saqiireene’e ilaahay ha u naxariisto faataxa”
Hargeysa (Ramaas) Mar.10, 2010 - Xisbiga mucaaridka ah ee UCID ayaa maanta xaflad soo dhawayn ah ugu qabtay Huteelka Maansoor ee magaalada Hargeysa taageereyaal tiro badan oo ka soo kala baxay xisbiyada UDUB iyo KULMIYE.
Guddoomiyaha Xisbiga mucaaridka ah ee UCID Eng. Faysal Cali Waraabe, oo ka hadlay xafladaasi ayaa u mahad naqay dhalinyarada degmada 26-ka June ee ku soo biiray xisbigiisa waxaanu ka waramay xaalada dalku maanta ku jiro.
Faysal Cali Waraabe wuxuu si qoto dheer uga hadlay midnimadii Somaliland la gashay soomaalidii koonfurta waxaanu tilmaamay inaanu jirin midow sharci ahi ee ay Somaliland isu dhiibtay Soomaaliya.
Guddoomiyaha oo ka hadlayay xaalada dalka Soomaaliya ee dariska la ah Somaliland wuxuu yidhi “Markii Somaliland aynu nabadda iyo dawladnimada dhisanay ayay Soomaaliyana dagaal bilaabeen dagaalka dagaalka ugu xun ayay ku jiraan waad ogtihiinoo dawlad gacan ku ribis ah ayaa Jabuuti loogu soo yagleelay, waxa la doonayaa in la keeno ciidamo gaallo ah iyo Maraykan ah taasna waxa keentay tallo xumadooda. Ummadda haddii uu Hoggaanku kaa xumaado waxa dhibteeda waxa tusaale inoogu filan dalka Ciraaq.”
Guddoomiyaha UCID wuxuu sheegay in dawlada Somaliland ay ku guul daraysatay inay ka soo dhalaasho waajibaadkii loo igmaday ee dhinacyada arrimaha bulshada, waxaanu yidhi “Shacbigeenu way dedaaleen waxay dalka abuureen shirkado kala duwan oo noocyo badan laakiin waxa meesha ka maqan doorkii dawlada. Shacbigu wuxuu leeyahay inuu cashuurtii bixiyo dawladuna waxa xaq loogu leeyahay inay waxbarashadii dhisto, caafimaadkii keento, wadooyinkii samayso, biyihii keento, nabadgelyadii ilaaliso. Maanta biyo ma haysano, iskuuladu waa lacag tayana ma laha, caafimaad hadalkiisaba daa, laydh ma lihin. Walaalayaal meelaha aanu xooga saaraynaa waa meelahaasi waa inaynu gaajada la dagaalano walaalayaal caasimadeenu miyay caasimad u egtahay.”
“Waxaynu noqonay qoys laba carruur ah lahaa oo labadii ilmoodba ka saqiireen dawladii Hoose iyo Tii Sareba way inaga saqiireene’e ilaahay ha u naxariisto faataxa. Walaalayaal waxaanu doonaynaa xisbi ahaan inaanu waxaasi bedelno oo aanu ka shaqeyno inuu qof kastaaba biyo nadiif ah helo,”ayuu yidhi Md. Faysal Cali Waraabe, waxaanu yidhi “Walaalayaal illaa 2003-dii markii la doortay Madaxweynaha maamulka Somaliland oo dhammi miyuu gaadhay dalkii oo dhan, Burco kama jiro magac ahaan uun bay maamulku uga jirtaa.”
Faysal Cali Waraabe wuxuu sheegay inay doonayaan haddii la doorto inay dalka ka hirgeliyaan dawlad awood leh oo shaqaynaysa. “Dawlada waxaan leeyahay diinka ayaa la yidhaahdaa indhaha ayuu wax ku koriyaaye’e dadku diin ma ahee gurmad bay u baahan yihiin, waxa laga sheekaynayay dhawaan meelo dalka ka mid ah markii carruurtii yar yarayd roobkii meel ay ka galaan ay waayeen ayaa digadii adhiga la jiifiyay, Walaalayaal intee in leeg ayaynu konton Wasiir masruufi karnaa muddo todoba sanadood ah ayaynu masruufaynay,”ayuu yidhi Guddoomiyuhu.
Sidoo kale, waxa xafladaasi ka hadlay Murrashaxa madaxweyne Ku Xigeenka xisbiga UCID Prof. Maxamed-Rashiid Sh. Xasan, waxaanu u mahad celiyay dhalinyarada xisbiga ku soo biirtay, waxaanu ka waramay barnaamijka xisbigaasi ee la xidhiidha dhinacyada waxbarashada, caafimaadka, shaqo abuurista iyo siyaasada.
Prof Maxamed Rashiid Sh. Xasan wuxuu ugu baaqay inay doorashada u diyaar garoobaan isla markaana ay codkooda siiyaan cida ay is leeyihiin wax bay ummadda iyo dalka u taraysaa.
Xubno ka mid ah taageereyaashaasi oo xafladaasi ka hadlay ayaa sheegay inay xisbigan ugu soo biireen markii ay ku qanceen siyaasadiisa waxaanay tilmaameen in Hoggaankiisu yahay dhiig cusub oo wax ka tari kara xaalada dalku maanta ku jiro.
Ramaasnews Desk
Hargeisa
its just funny though when they say xisbiga ucid wa xisbiga dhaliyarada 
hada faisal cali waraabe wa 64 jir 
