Boqoradii adduunyadu tiqiin beri sabaan jiitay
Bir adayga qarankii lahaa baxada iyo xooga
Gaalada kuwii beydadshee beerka ka asaashay
Badraan iyo cayaar kuma galaan loo bilaash dilo'e.
Aar cadho burkii jabiyoo booca karinaaya
Maroodiga banaan qooqaya iyo qalanjo buubaysa
Waran bagax ah odayaal sitaa uma bafeeyaane
Inkastaad barwaaqo iyo nabad ugu bishaarayso
Gun balaayo kaa doontey oo boqon ku goynaysa
Baaruuda in aad buufisa waa banaan tahaye
Bah yaraa bur hoostiis gala oo baqo dharaartiiye
Bariistiyo hadhkiibaa tolkay col u badheedhaaye
Barqo weerar baa lagu yaqaan baarka aan ahaye.
Hadaad cadho bugood mira tahoo gaadho badankooda
Buntukh iyo lagumaba waabin karo belel rasaaseede
Burmadkii aad wax badan biirisay iyo boqoshii aad jeexday
Booraamo adigoo galay oo beerka dhigay keymo
Biriigan adoo haysta iyo boobe ololaaya
Beebeeya adigoo wata iyo kaare bahar daada
Isbariiqsi sow Haber-jeclow biid ma tari waayin.
Beydari Dhulbahante ah miyaa kala baxay goobtii
Barbaartuu Saciid dhalay miyaa Balal ku leefsiisey
Sidii geel horwayn booshiya baacsadoo jiidhay
Barsayntii horeetaba miyaan boodhku ku asqaynin
Baqataye miyaan Baalidhaye balaslihii gaadhin
Barbar riiqadkiinii miyaan budulku jiidnaanin
Buul baad is moodaye miyaan ba'eyey kaa yeedhin
Burco iyo Hargeysaba miyaan tegin baroortaadu
Adigoo bisaas leg miyaan malihii beenoobin.
Sow libaaxyo barad seexday meel badle ma maqashinin
Burka fooda waxuu saaro oo beer ku socoteeyo
Badbacaado sow kuguma qaban barida iyo xooga
Sow mici bilaawaha ka dheer kumaba baalbaalin
Mawjado is boortoo sidii baarqaba u doobshay
Adigaa bad ku gudaheed galay ee balo hakaa saarto
Wax badan baad colaad baafisay ee wiish makula booday
Gobtii biriiga weyneed miyey bixiso kuu geysay.
Adiga iyo boonaha yaroo jiidhka sare buusan
Buurbaad marti gelin jirteen barada daanyeere
Aqalkiinu buur buu ahaa beeyo xabagteede
Dhawaanbaad balida hawdka iyo bananka daaqdeene
Buntukh iguma riixine dhibtaan kaaga beer naxaye
Nasab baa abaal bura boga oo bixin yaqaantiine
Dib bay kuu gagabisa guntii baarka loo fidho'e.
Muslin iyo Buluugley nacdiyo calan bidhaankiiye
Kufri balagleh naago raacde iyo boontii gaalado'e
Buqul yahow Amxaaraduw adee buushe lagu jiitay
Intaad nabad burburiskaad wadiyo beelo kala sooca
Buntukh baa inoo xeera iyo Boobahii dhadaa'e
Birtuun baa ku gaadhay ee miyaan bogay dagaalkaaga
Jeeraan banaan ka tirtiro barasho kuu laabo.
Dadkeena colaad lagu bogmiyo balo kala gaadhin
Marti booqasho ahoo u timid beelo deriskooda
Geesi xidid u baxar daadshay oo bixiyey maalkiisa
Baradiina magan joogta oo bara iyo qoys raaca
Inuu kibirku idiin baaqo oo idinla buubaabey
baadilkaad rasaas kala dhacdeen buunka feedhaha'e.
Dhowr boqol aday kaa godoo baqana kuu raacay
Beydkiyo bagaad uga qaxdeen buulashiyo maalkii
lafta badhi bagaad uga jabteen biixiyaha taagan
Jahaadkii fardihii naga bulmay baasihii madhiyey
Baqigii ka soo hadhay yaraa ee Eebbe noo badiyey
Kuman booda kuman yaal balyaxa aad bafto cad moodo
Kuman yaal barood ciida iyo kuman bawaasiir ah
Kuman yaal bulaalaha ashkira oo baayiroo naaxay
Intaas oo farii fooda baray baacis iyo weerar
Sengayaal la badhi siiyey baa beylah ka aheliye
Baxsan maysid maantaan dagaal kuu balaadhsado'e
Bulbulha cartamay ha ula tegin beebe iyo qeylo
Yaan bariiska Libiya ku dilin baali baad tahaye.
Baalalayda tiraabiyo kolkuu Biiraha cantuugo
Iidoorku been buu shubaa baanis iyo faane
Buqbuqdhabaye waligii sidii baardhabka xagaaga
Boqol iyo jar kama leexdo iyo bir iyo haadaane
Biyihiisa Irir baanu nahay farac ka soo beydha
Hawiye ula beebayste iyo baqarka dhoobeeye.
U bahayste Daarood col bey beerka ku hayaane
Daanyeerka buuraha korey ee midhaha boobaaya
Ma bariijin waligiis libaax beeg u joogsadaye
Dameer aan bir qaw lala sudhoo bacad ku heeryeeye
Oo aan bariis saaray iyo bur iidaankii
Maxaa Baruruftiisa iga galay ha ii banaaxiyo'e.
