Cadde Muusse oo iclaamiyay dagaal Galkacyo looga sifeeyo beesha GalMudug
Garowe 29/July/2008 Waagacusub.com
Madaxweynaha Maamul goboleedka Puntland Cadde Muusse Xersi ayaa markii ugu horeysay ku dhawaaqay inaysan Magaalada Galkacyo yeelan karin labo Maamul oo lagu kala magacaabo Puntland iyo GalMudug.
Cadde Muusse oo hadalkiisa lagu faafiyay Shabaakadaha Puntland ayaa ku beegmay xilli uu saraakiisha amniga Maamulkiisa ku siiyay amar inay koofurta Galkacyo ka sifeeyaan waxa uu ku sheegay kooxda GalMudug iyo dadka tiradda yar ee taabacsan.
Afhayeenka GalMudug State Mr Baasto ayaa hadalka Cadde Muusse ku fasiray riyo maalmeed wuxuuna tibaaxay inuu olole ugu jiro dagaal ka dhex qarxaha beelaha Majeerteen iyo Sacad ee wada dega gobolka Mudug.
"Cadde Muusse wuxuu qabaa cuqdad iyo dakano dagaalkii dhexmaray isaga iyo Cabdulahi Yusuf ee lagu dilay sedex boqol oo u dhashay jufadiisa Cismaan Maxamud,waana sababta uu uga shaqeeynayo dagaal dhexmara beelaha Sacad iyo Cumar Maxamud"ayuu yiri Afhayeen Baasto.
Baasto wuxuu xusay in dagaal ka qarxo Gaalkacyo ku ekaan doonin gobolka Mudug balse uu horseedi karo inuu saameeyo Madaxtooyadda Cadde Muusse ee Garowe.
Qurba jooga u dhashay beelaha Sacad iyo Cumar Maxamud ayaa cambaareeyay ololaha colaadeed ee ka socda gobolka Mudug,waxayna shacabka degaanadaas ugu baaqeen feejignaan iyo isku xirnaan siyaasadeed.
" Reer Mudug ayaa loo yaqaan beelaha gobolkaas wada dega,waxaana loogu necebyahay beelaha Soomaaliyeed oo hal cadaw ayey leeyihiin laakiin nasiib daro,waxaa soo ifbaxayo muuqaal laga naxo oo horseedi karo qax iyo burbur ay la koowsadaan"ayuu yiri mid ka mida aqoonyahanada ku dhashay Galkacyo oo la soo xiriiray Waagacusub.
