http://www.dayniile.com/febaraayo009/13 ... raayo5.htm
Sidoo kale, xubno si weyn loo hadal hayay inay ugu dhow dhowyihiin qabashada xilka ra’iisal wasaaraha ayaa galabta laga reebay Liiska dadka uu qaabilayo madaxweynen Shariif Sheekh, waxaana ka mid ah xubnahaasi laga tegay Maslax Max’ed Siyaad, C/rashiid Cirro, C/risaaq Jurile iyo Max’ed Cabdi Yuusuf oo iyagu berryihii ugu dambeeyey ku jiray olole ay ku doonayaan jagadan ra’iisal wasaaraha.
Sidoo kale, xubnaha aan hore loo sii saadaalin inay ku jiraan liiska dadka u sharaxan jagadan ra’iisal wasaaraha amaba aanan lagu tiring jirin inay ugu dhow dhow yihiin ee galabta madaxweynuhu qaabilayo ayaa waxaa ka mid ah Siciid C/llaahi oo loo yaqaano (Deeni) oo isagu ka mid ah ganacsatada sida weyn looga yaqaano Puntland, Max’ed Cusmaan Aadan (Edsan) oo isagu ka mid ahaa musharaxiintii jagada madaxweyne-nimada, wiilka uu dhalay ra’iisal wasaarihii hore ee dalka Soomaaliya Cumar C/rashiid Cali Sharmaake, Nuur-diin Diiriye oo isaguna ka mid ahaa musharaxiintii jagada madaxweyne-nimada maamul goboleedka Puntland, Cali Cabdi Awaare oo ahaan jiray wasiir ka tirsan Puntland, ahna maamulaha idaacadda iyo TV-ga SBC iyo xubno kale oo ka socda dhanka bulshada Rayidka qaarkoodna ay la shaqeyn jireen hay’addaha Qaramada midoobay.
Ganacsade Siciid C/llaahi Deni oo isagu ka mid ah saraakiisha ugu sareysa ee shirkadda ganacsiga ee Towfiiq oo si weyn looga yaqaano gobolada Koofurta, sidoo kalena ka mid ahaa ururkii Al Islaax ayaa si gaar ah loo hadal hayay maalmihii ugu dambeeyey iyadoo lagu xamanayay inuu kalsooni buuxda ka heysto madaxweynaha cusub ee maamulka Puntland Mr. Faroole, halka sidoo kalena uu kalsooni ka heysto ganacsatada reer Muqdisho oo iyagu muddo ay soo wada shaqeyn jireen, lana dhacsan yihiin qaab dhaqankiisa iyo siyaasadihiisa.
Sidoo kale, waxaa jira xubno ka tirsan baarlamaanka cusub oo iyagu uga digay madaxweynaha in loo magacaabo ra’iisal wasaare Mr. Deni, sababtoo ah bey yiraahdeen wuxuu ka mid ahaa xubnihii diidanaa qadiyadii maxkamadihii Islaamiga iyo Jihaadkii ka dhanka ahaa ciidamadii Xabashida ee iyagu mudada labada sano ah halaaga ka waday gudaha dalka Soomaaliya.
Ugu dambeyntiina madaxweynaha ayaa la filayaa in 24-ka saac ee soo socota uu ku dhawaaqo shaqsiga noqonaya ra’iisal wasaaraha Soomaaliya, maadaama uu isaguba shalay ka dhawaajiyay in sida ugu dhaqsaha badan uu u magacaabayo.
