Caqabadaha Furdaaminta U Baahan Ee Horyaala Komishanka Cusub Ee Maanta La Ansixiyey Ee + Sawirada Xubnaha Komishanka
Hargaysa (Oodweynenews)- Xubnaha todobada ah ee Golaha Wakiilada Somaliland maanta u ansixiyeen mansabka Komishanka doorashooyinka Qaranka, ayaa waxa horyaala arrimo badan oo aad u culus una baahan xil-gushado wax-ku-ool ah.
Komishankan oo noqonaya kii saddexaad ee qabta masuuliyada hawlaha doorashooyinka Somaliland, ayaa waxaa looga fadhitaa inay si dardar leh u bilaabaan hawlahooda, isla markaana inay dhex-dhexaad u noqdaan xisbiyada qaranka ee uu ka dhexeeyo loolaanlanka siyaasadeed iyo ka doorashaduba.
Waxaa kaloo looga fadhiyaa inay hawlaha horyaala ku bilaabaan karti, hufnaan iyo ka-fiirsasho badan oo ay ku dheehantahay aqoon iyo kalsooni, iyaga oo ay hortaalo caqabado badan oo ay ka mid tahay dib-uga-shaqaysiinta hawlihii diwaan-gelinta ee muraga iyo fashilku la soo gudboonaaday, inay la shaqeeyaan khubarada wadanka imanaysa ee ka hawl-gelaysa sixida natiijada diwaan-gelinta.
Waxaa kaloo laga sugayaa muddaynta iyo ka midho-dhalinta doorashada madaxtooyada oo dhawr-jeer dib-u-dhacday, inay soo celiyaan haybadii iyo kalsoonidii lagu qabay komishanka.
Waxaana sida dad badani aaminsan yihiin ay hawlahaas iyo caqabadahaas oo dhan ay kaga tallaabsan karaan iskuduubni, wada-shaqayn iyo iskaashi dhexdooda ah, iyo inay ka kor-maraan caddaadista iyo carqaladaha kaga imanaya xisbiyada iyo qabiilka oo Komishankiin hore ay sheegeen inay ragaadiyeen gudashada wax-qabadkii iyo waajibaadkii looga fadhiyey.
Isku soo wada-duuboo, komishankan cusub ee maanta la ansixiyey ayaa caqabadaha ugu horeeya ee horyaala, waxa ay noqonayaan muddaynta xiiliga ugu munaasibsan ee la qabanayo doorashada madaxtooyada ee inta badan soo jiitamaysay, dejinta istaraatiijayadii qabsoomida iyo hir-gelinta hawlada doorashooyinka, soo saarista liis ku tacaluqa waangelintii codbixiyaasha oo sax ah oo suurta-geliya in la qabto doorasha, soo noolaynta sumcadii iyo karaamadii komishanimo.
C/shakuur Xaaji Muxumed Muuse [C/heersare]
Oodweynenews.com/ Hargaysa/Somaliland
Cabdiheersare01@hotmail.com/heersare2009@gmail.com
