Wararka ka imanaya magaalada Sanca ee dalka Yaman, ayaa sheegaya in kulan halkaasi ku dhexmaray wefdi uu hoggaaminayo Madaxweynaha Puntland, Cabdiraxmaan Faroole, oo ay ka mid yihiin wasiirka arrimaha gudaha, Ilkajiir, iyo kan horumarinta reer miyiga, iyo madaxweynihii hore ee TFG iyo Puntland, mudane Cabdullahi Yuusuf Axmed. Kulankan ayaa saxaafadda qaarkeen ku sheegtay mid salaan ahaa, laakiin ilo aannu xaqiiqda dhabta ah ka helnay ayaa noo sheegay, in kulanku run ahaantii khuseeyey sidii Faroole xukunka looga casili lahaa, maaddaaba tan iyo intuu xukunka la wareegay 2009-kii, qas iyo dagaal Puntland ka bixi la’adahay.
Waxa kale oo isana ku leh kulankan Cadde Muuse oo isna ka mid ahaa madaxweynayaashii dhaxalka ku soo xukumay Puntland. Sida dhabta ah, oday C/lahi ayaa raba in Mr. Faroole iscasilo sababahan awgood.
1. Ammaan xumada dalka: dagaallo ka aloosan Gobolka Bari siiba Galgala iyo Ufeyn, Cagaarre, Gaalkacayo. Iyo weliba shaqaaqooyin ka dhacay caasimadda Garoowe.
2. Dhaqaalihii oo dhulka galay; sicir bararkii oo kordhay; mushahaaro la’aan haysata ciidanka ka hawlgala dalka.
3. La tashi la’aan odayaasha iyo waxgaradka dalka, iyo indhala’aan talada Faroole oo isugu maja ururtay Garoowe uun. Iyadoo Oday C/lahi ugula dardaarmay Faroole 2009kii: “meeshaad xukumi doontaa maaha Garoowe ee waa Puntland…,” Yuusuf.
4. Iskudir qabaa’illada walaalaha ah ee ku dhaqan geyiga Puntland, iyadoo si khaldan loo isticmaalayo shaatiga argagixisada.
5. Barakicin dad masaakiin ahaa oo koonfurta Soomaaliya ka soo qaxay. Kuwaasoo hantidoodii lagala wareegay, ka dibna loo gudbiyey xaafadda Baraxley ee Gaalkacayo. Masaladan oo si gaara welwel ugu haysa Oday C/lahi, maaddaaba maammulka Galmudug awooddiisa arritani wax ka beddeshay.
6. Fashilkii iyo iscasilaaddii ku timid Raysalwasaarihii hore ee TFG Cumar Cabdirashiid oo asal ahaanna Puntland ka soo jeeda. Tanoo odaygu u arko in Faroole ku fashilmay inuu badbaadiyo kursiga ina Cabdirashiid. Isla markaana ay u socon weydey inuu Faroole ku beddelo nin isla jifadooda ah.
7. Xal u helid la’aanta dilalkii madaxda sare ee Puntland ee la khaarajiyey intii Mr. Faroolo kursiga ku fadhiyey, gaar ahaan AHN) Warsame Cabdi Shirwac (Seefta Bannaanka) oo Gaalkacayo lagu khaarajiyey, lagana qancin waayey beeshuu ka dhashay ee Ibraahiinno, wax u cuntami kara.
8. Nin jeclaysiga iyo u adeegidda laamaha dawladda ee Jifada Faroole. Tan oo khilaaf weyni dhalisay muddooyin badan maaddaaba shaqooyinka dawladda Faroole ku koobay ilmaadeerradiis oo qudha.
9. Dayrinta bulshada Reer Sool, oo dhulkoodii xoog lagu haysto gaar ahaan Laascaanood, iyo u gacan haadinta Faroole ee maammulka goonni u goosadka Somaliland.
10. Furitaanka qunsuliyadda Itoobiya magaalada Garoowe ka furatay iyo ka hawlgelidda ciidammada sirta ee Itoobiya gudaha Puntland. Gaar ahaan dhoofinta dadka walaalaha ah ee reer Ogadeeniya oo xukuumaddu cadow u gacan gelisay marar badan.
11. Ku lug lahaanshaha burcad badeedda ee Faroole, tanoo guux weyn dhalisay iyadoo budhcaddu salka dhigatay caasimadda Puntland ee Garoowe, ayna Eyl u tahay saldhig ay ka duulaan.
12. Tahriibta xeebaha Puntland ka aloosan, halkaasoo kumannaan masaakiina ku halaagsamaan bad yarada u dhaxaysa Soomaaliya iyo Yaman.
Qodobbadaa aan kor ku soo sheegnay iyo kuwa kale oo badan ayaa keenay in laga dalbo in Faroole is casilo. Waxana la sheegayaa in Oday Cabdullahi rabo in xukunka loo dhiibo Gen. Ilkajiir oo ay aad isugu dhow yihiin isaga. Faroole oo ka biya diiday talada oday Cabdullahi ayaa lagu wadaa in lagu samayn doono ‘impeachment’ oo macneheedu yahay in xukunka laga casilo iyadoo sharciga la raacayo.
Wixii arrimahan ka soo kordha kala soco Laasqoray Online
