Shacabka ku dhaqan magaalooyinka kala gedisan ee Gobolka Gedo ayaa maalintii 3-aad u dabaal degya munaasabadda Ciiddul Adxaa oo kamid ah munaasabadaha ay u fantasyeeyaan Muslimiinta caalamka.
Wararka nagasoo gaaraya magaalada Beled-xaawo ayaa sheegaya in Kumanaan shacab ah ay ku damaashaadayaan wadooyinka waaweyn ee magaaladaasi waxayna isdhaafsanayaan waxyaabo macmacaan ah oo ay isugu hadiyadeynayaan.
Magaalada Baardheere ee gobolka Gedo ayaa iyana kamid ah meelaha sida farxadda leh looga oogay munaasabadda Ciidda, shacabka Gedo iskuma khilaafin dabaal degga ciidda, salaaddii ciidda ayay dadku ku dukadeen fagaarooyin ku yaal degmooyinka Gobolka.
Gudoomiyaha gobolka Gedo u qaabilsan Xoogaga Islaamiyiinta Sheekh Bishaar ayaa shacabka ku dhaqan Gedo ugu hambalyeeyay soo gelidda munaasabadda Ciidda.
Gudoomiyaha oo shacabka kala hadlay Idaacadaha gudaha ayaa sheegay in shacabka Gedo ay sanadkan ku haystaan amaan iyo kala dambeyn wuxuuse ka tacsiyadeeyay shacabkii ku dhintay dagaallo dhawaan ka dhacay magaalada Beled-xaawo.
magaalada Caasimadda ah ee Garbahaareey ayaa lagu Gowracay Boqolaal neef oo udxiyo ahaan ay u sadaqaysteen dad Muxsiniin ah, shacabka magaaladaasi ay helay Hilib badan oo ay ugu deeqeen ganacsatada magaalada iyo dadka Jeebkoodu ladanyahay.
Magaalooyinka Ceel-waaq iyo Ceel-cadde ayaa iyana si heer sare ah looga dabaal degay Munaasabadda Ciidda, carruurta ayaa ku ciyaarayay qalabka ciidda sida Bastooladaha leyrka leh iyo agabyo kale waxaana sanadkan meesha ka baxay baaruudda ay caruurtu Bastooladaha ka ridaan.
Ganacsiga magaalada Beled-xaawo ayaa ah mid aad u sareeya waxaana wax kala gadasho saa’id ah laga dareemayaa qoobaha lagu iibiyo cabitaanada iyo waxyaabaha Macmacaanka ah.
Ma ahan markii ugu horaysay oo ay shacabka ku nool gobolka Gedo si isku mid ah ugu dabaal degaan munaasabadda Ciidul Adxaa, sanadkii lasoo dhaafe ayaa sidaan oo kale loogu damaashaaday ciidda.
Daahir Guuleed, Allgedo Online
