Guriceel:(Sh. M. Network) Iska horimaad sababay dhimasho iyo dhaawac ayaa maanta ka dhacay gudaha magaalada Guriceel kaasi oo u dhaxeeyay ciidamo ka tirsan Maamulka Ahlu Sunna Waljamaaca iyo Maleeshiyo Beeleedyo ku sugan halkaasi
Iska horimaadkaan ayaa waxaa uu bilaawday kadib markii Maleeshiyo Beeleedyo ay la fakadeen gaari gacanta ay ku hayeen Maamulka Ahlu Sunna, gaarigaasi oo markii hore lagala soo goostay Xisbul Islaamkii ku sugnaa degmada Xarardheere ee gobolka Mudug.
3-qof ayaa ku dhimatay tiro intaasi ka badana way ku dhaawacmeen kuwaasi oo u badnaa dad rayid ah, waxaana la sheegay in Maleeshiyo beeleedyadii 8-ka mid ah ay xireen ciidamada Ahlu Sunna ee degmadaasi.
Ma’uuliyiin ka tirsan Maamulka Culumaa’udiinka Ahlu Sunna oo xiriir la samaynay ayaa waxaa ay sheegeen inay jiraan qasaari soo kala gaaray labada dhinac ee halkaasi isku rasaaseeyay, iyagoo sheegay inay ku daba jiraan cidii ka dambeysay.
Wararka laga helayo magaaladaasi ayaa sheegay in caawa bandow lagu soo rogay magaalada Guriceel ee gobolka Galgaduud, iyadoo aan la sheegin inta habeen oo uu soconayo Bandowgaasi.
