Garoowe,(Lasanod Online)- Maamulka Puntland ayaa is ka fogeeyey inay ku lug-leedahay dagaalladii shalay ka dhacay dagaanka Gambadhe ee bariga Laascaanod,
waxayna ku tilmaantay in dagaalladu u dhexeeyaan malleeshooyin beeleedyada degaanka iyo ciidamada Somaliland.
Wasiirka Warfaafinta Puntland Axmed Cali Askar ayaa sheegay in ayan dawladdiisu wax ciidan ah ka joogin dhulka la isku haysto, balse waxa dagaallamayaa ay yihiin shacabka oo ka gadoodsan xadgudubyo isugu jira dil loo gaystay dad rayid ah iyo xabsi lagula kacay shakhsiyaad maamuus ku leh bulshada dhexdeeda oo kor u dhaafaya afartameeyo. Waxa uu intaa ku daray in ciidamada Puntland ayan haatan qayb ka ahayn dagaalkan.
Mar wax laga waydiiyay mawqifka Puntland ee colaadaha socda iyo xad-gudubyada uu sheegay in ay gaysteen ciidamada Somaliland, ayuu sheegay in maamulkiisu ay arinkaas ka leedahay siyaasad leh diblumaasiyaddeeda fulineed iyo xeerinteeda duruufeed. Si kastaba ha ahaatee ma uusan qeexin waxa ay tahay siyaasaddaasi.
Axmed Cali Askar waxa uu ku celceliyey hadalkii madaxwaynaha Puntland ee ahaa in ay tixgalinayaan nabadda iyo daris-wanaaga balse haddi ay ka fursan waayaan ay qaadi doonaan tallaabo walba oo ay maamulku ku gudanayso waajibaadkeeda.
Waxa jira dhalleecayn kulul oo dawladda Puntlland kaga imanaya dadwaynaha Puntland gaar ahaan kuwa Sool, Sanaag iyo Cayn, taasoo ku wajahan sida ay Puntland ka yeeshay ilaa iyo hadda duruufaha colaadeed ee ka aloosan gayigaas.
Copyright © 2010 Lasanod.com
